20.02.2019 | Sprache/Literatur Aktuelles

Dat weer „Plattdüütsch Vördregen“

Deep in den Buuk aten, allens mitswingen laten, dütlich utspreken.

Föffteihn Lüüd weren sünnabend, 16. Februar in Rendsborg bi dat SHHB-Seminar „Plattdüütsch Vördregen“.

Blangen de Arbeit mit den Körper as Stimmgever un Resonanzruum kregen de Deelnehmer ok Ideen an de Hand, woans een sien Publikum to’n Luustern bringt oder wat se maken künnt, wenn welk den Vördrag stöört. Referent Helge Albrecht is siet lange Johren op düütsche Poetry-Slam-Bühnen ünnerwegens. He ööv mit de Deelnehmer, dat se Texten mit verscheden Stimmungen as trurig, erotisch, lustig oder duun lesen schullen, wat de Lüüd ut heel Sleswig-Holsteen düchtig Spaaß maak. Seminarleiter Jan Graf vun’n Heimatbund maak ümmer wedder kloor: De Hauptperson is dat Publikum; de Vördrag mutt dat würklich ünnerholen! Natüllich hebbt se ok över dat Thema Plattdüütsch snackt. Jedeen, de vördriggt, schall den Text op sien egen Mundoort hen ümarbeiden, dat he goot över de Tung geiht.

An’t Enn seen de Deelnehmer, se harrn düchtig wat tolehrt. Besünners de Kritik vun de annern in de Grupp harr wat bröcht.