08.01.2021 | Sprache/Literatur Aktuelles

Plattdüütsch schrieven

Saßsche Schrievwies online verkloort

Schriev ik nu „Straten“ oder „Straaten“, heff ik di „leev“ oder „leef“, un wat is de Verscheel twüschen „een“ un „en“? Dünnersdag, den 07. Januar, geev dat bi den Heimatbund en Fieravend-online-Seminor „Plattdüütsch Schrieven“. Ünner dat Leit vun Christiane Ehlers (Nedderdüütschsekretariat) un Heimatbund-Referent Jan Graf kregen de twölf Deelnehmers ut Neddersassen, Bremen, Hamborg un natürlich Sleswig-Holsteen de Grundlagen vun de plattdüütsche Schrievwies na Johannes Saß wiest un schullen ehr denn vun tohuus ut gliek an´n Bildschirm anwennen. Na tweeunhalf Stünnen suus mennigeen de Kopp, man de mehrsten seen, ehr harr dat düchtig wiederbröcht. De Heimatbund sprickt sik för dat Anwennen vun de Schrievwies na Johannes Saß ut. Dat versteiht sik vun sülvst för en Kulturspraak: Wenn Plattdüütsch in Pädagogik, Medien, Sellschop to bruken ween schall, mutt dat Schrievregeln geven, to de een sik verlaten kann.