20.04.2021 | Sprache/Literatur Aktuelles

Zum Welttag des Buches am 23. April 2021

Plattdeutsche Texte schreiben kann man lernen, die Schreibwerkstatt vermittelt dazu das nötige Handwerkszeug - seit 30 Jahren.

"Mien Fründ" von Gunda Gey aus "Över uns un anner Lüüd"
0:00

Schrieven is (ok) en Handwark

Texten schrieven – kann ik dat? De Fraag stellt sik vele Schrieverslüüd jümmers wedder. Dat gifft en niege Thema för en Schriev-Wettstriet …

Un woans geiht dat nu wieder, wenn de Överschrift op’t Papeer steiht? Wat kümmt toeerst, wodennig bo ik mien Geschicht op? Woveel Personen – en Ik oder keen Ik – en He un en Se? En apen Enn?

Soveel Fragen för den Minschen, de nu ünner de Schrieverslüüd gahn will.

Hölp un Stütt gifft de Sleswig-Holsteensche Heimatbund (SHHB) nu al siet 30 Johr. Siet de Tiet gifft dat Warksteden för dat kreative Schrieven vun Texten. Tosamen mit anner Schrieverskollegen un mit kompetente Dozenten warrt arbeidt, an de Texten kretelt un fielt, bi de Warksteed warrt Spontantexten schreven – un kloor is, dat gifft Huusopgaven.

To’n Bispill schullen de Lüüd mal op en letzten Satz henschrieven, de weer vörgeven, oder en Dialog schrieven. Biografisches so as den eersten Schooldag, den Dag vun de Konfirmatschoon, den letzten Schooldag, dat sünd de Themen ween. Man ok: torüch in de Tiet – op de anner Siet vun de Eer – en Bild beschrieven – ut en Steckbreef en Geschicht maken – vör hunnert Johr, as de Grootöllern jung weren …. över all de Johren is veel tosamenkamen. En kumplette Schrievwarksteed hett sik mal mit dat Genre „Roman“ uteneen sett.

De mehrsten Deelnehmers sünd över lange Johren wedderkamen oder sünd noch dorbi. Se hebbt markt, se bruukt düt Korrektiv för dat egen Schrieven. Un velen seggt: weer ik nich bi de Warksteden ween, ik kunn nich so schrieven as nu.

Is nich eenfach, sik nochmal op so en „Schoolbank“ to setten – de mehrsten kaamt eerst in’t Rentenöller dorto. Vörher weer keen Tiet. Un denn is dat doch wunnerbor, wenn mit Hölp vun de Warksteed-Dozenten en gode Geschicht oder sogor en richtigen Roman dorbi rutsuert. De Fraag: Texten schrieven – kann ik dat? hett dor denn de passlich Anter kregen. Ja, mit dat richtige Handwarkstüüch kann ik dat. Un wenn denn noch en düchtige Portschoon gode un kreative Ideen dortokaamt – un de Schrieversche oder de Schriever ok geern mit Wöör spelen mag, denn warrt dat allerbest.

In dat Johr 1991 reep de Sleswig-Holsteensche Heimatbund to’n allereersten Mal to so en Schrievwarksteed op.

Middewiel gifft dat bi den SHHB vele vele Ordners vull mit Geschichten ut de Schrievwarksteden vun 1991 an bet vundaag. Rechttiedig to dat 30. Johr is dat dat nu sowiet: 30 Geschichten vun 30 Schrieverslüüd – de Utwahl is recht wat swoor fullen, un ganz seker kunn een noch dreemal soveel Texten rutsöken. De mehrsten Themen schullen afbillt ween, ut de mehrsten Johren schull wat dorbi ween.

So schall düt Book „Över uns un anner Lüüd“ torüchkieken un de Idee vun de Schrievwarksteed ok en lütt beten fiern, man dor stickt ok binnen: uns Regionalspraak Nedderdüütsch döggt as Literaturspraak – wi köönt ehr mit all ehr verscheden Klören un ehr schönen Wöör allerbest bruken. As Grundlaag för de Schrievwiesen gellt ok hier dat Wöörbook na de Sass’schen Regeln.

Dat geiht wieder mit Schrievwarksteden bi den Sleswig-Holsteenschen Heimatbund – för Instiegers un ok för ole Hasen, wat se nu twintig oder söventig Johr oolt sünd. Denn een Deel gellt ok hier: Schrieverslüüd köönt jümmers noch wat dorto lehren.

Marianne Ehlers

Zum Welttag des Buches haben Marianne Ehlers und Jan Graf vier Geschichten aus "Över uns un anner Lüüd" eingesprochen.

Mehr plattdeutsche Literatur finden Sie hier.