Ehlers, Marianne (Hrsg.)
Laat uns fiern
„Ik heff dor mal wat mitbröcht!“ Jedereen kennt düssen Satz, wenn op eenmal Unkel oder Tante bi en Geboortsdags- oder Hochtietsfier opstaht un en Zeddel ut de Tasch haalt. Mitünner kümmt denn en schöne Gedicht oder en Geschicht, mitünner aver ok nich.
Düt lütte Book, jüst frisch op den Bökermarkt, kann hölpen. Dor kann man wat finnen för all Gelegenheiten, för Festen un Fiern. Man ok för de trurigen Daag in’t Leven sünd passliche Spröök dorbi. So schrifft Dieter Staacken: „Ik bün nu weg, man noch nich doot, ik bün man een Döör wieder. De is man lüttjet Enn to Foot un blots ’n poor Foot sieder.”
Ok för en besünner Koort finnt sik wat. Bekannte plattdüütsche Gedichten sünd dorbi, man ok niege Översettens vun hoochdüütsche Lyrik, so as ut de „Maandnacht“: „… un mien Seel spann wiet wiet ehr Flögels ut, flöög dör de stillen Lannen, as flöög se hen na Huus.“
Laat uns fiern. Plattdüütsche Texten to’n Vördregen, Vörlesen un Opschrieven.
Torechtmaakt un rutgeven vun Marianne Ehlers.
Hamburg: Quickborn 2021.103 S. 10,00 €