Budich, Carl
Dat grote bunte Budich Book
Twüschen Vergnöögtes un Lustiges is ok en beten wat Philosophenhaftiges dorbi, wat Carl Budich (1904-1982) in düt Book opschreven hett.
So is „bunt“ denn ok dat richtige Woort för düsse korten Stücken. Man kann jüm seker bi verscheden Gelegenheiten vörlesen un dorbi denn ok över ole Tieden snacken.
De Schoolmeister un Schrieversmann stamm ut Reinfeld in Holsteen un weer lange Johren an en Lübecker Gymnasium as Studienraat. För de Nedderdüütsche Bühn in Lübeck schreev he en Reeg vun Theaterstücken, de goot bi dat Publikum ankemen. Ok Schoolböker hören to sien Wark.
32 Böker schreev he över de Johren, meisttiets in de Oort vun düssen Titel. De Ulenspegel, de Kinnermund, de Seefohrt, de Leev – dat Leven in all de bunten Klören stickt in de Geschichten un Dööntjes vun em binnen.
Budich, Carl: Dat grote bunte Budich Book. Lustige Saken vertellt vun Carl Budich.
Lübeck: LN-Verlag 1978.
Düt Book is in’n Hannel nich mehr to kriegen, man över’t Nett is dat to finnen, man ok in meist jeedeen Bökerspenn.