luut & düütlich: Sennen vun Dingsdag
De Sennen "luut & düütlich" vun den 24. Februor 2026 to'n Nahören
De Narichten vun den 24. Februor
Ne’e US-Töll sünd in Kraft
De weltwieden Importtöll vun de USA in Hööchde vun pauschal teihn Perzent sünd vundaag offitschell in Kraft treden. De ne’e Tollsett is per Gesett op 150 Daag Frist. En Verlängern müss de Kongress tostimmen. US-Präsident Trump harr de Afgaav ankünnigt, nadem de Böverste Gerichtshoff de mehrsten vun sien Sünnertöll bet nu för unrechtmatig verkloort harr. Vunwegen dat Urdeel klaagt nu de Logistikkonzern FedEx gegen de US-Regeren. Dat Ünnernehmen will dörchsetten, dat de betahlten Töll kumplett torüch geven warrt. To de Hööchde vun de fodderten Summ maak FedEx keen Angaven. Dat is de eerste Klaag vun en groot US-Ünnernehmen, wiedere schullen nakamen. De US-Regeren harr dör de unrechtmatigen Töll na Överslääg mehr as 130 Milliarden Dollar innahmen, ümrekent rund 110 Milliarden Euro.
Steinmeier bi Ukraine-Andacht in Berlin
In Berlin hebbt Politikers un Geistliche bi en Gebeet in de Franzöösche Friedrichstadtkark de Offers vun veer Johren Ukraine-Krieg dacht. Ünner de de dor weren, weren ok Bunnspräsident Steinmeier, Butenminister Wadephul un de Bottschopper vun de Ukraine, Makeiev. De kathoolsche Prälat Jüsten see, Gewalt dörv un warrt nich dat letzte Woort hebben. De evangeelsche Prälatin Gidion see, de Vertwiefeln in de Ukraine is verbunnen mit den Moot to’t Leven.
3 vun 100 Minschen sünd offline
De Tall vun de Minschen in Düütschland, de noch nie nich in’t Internet weren, geiht wieder torüch. Na dat Statistisch Bunnsamt leeg se in dat verleden Johr bi 2,1 Millionen. Üm un bi dree Perzent vun de Personen twüschen 16 un 74 Johren bruken de Angaven na dat Internet gor nich. 2021 weren dat noch söss Perzent. De Statistikbehöörd wies dorop hen, dat intwüschen vele Deenstleisten meist blots noch online anbaden warrt – as to‘n Bispeel Termin- un Ticketboken oder Överwiesen. För Minschen ahn Internet warrt dat dorüm tonehmen sworer, ehrn Alldag to schaffen.
Raathuus-Mitarbeiders vermehrt Offer vun Övergrepen
Mitarbeiders in Raathüser warrt fakener beschimpt un bedroht. Dat wiest en Ümfraag vun NDR Sleswig-Holsteen. Besünners faken berichten de Verwaltens vun en Anstieg bi verbale Övergrepen. Vele Kommunen, dorünner Lübeck, Niemünster un Flensborg, setten dorüm middlerwiel Sekerheitsdeensten in.
Hochwaterwarnen för Delen vun Sleswig-Holsteen
För den Süden vun Sleswig-Holsteen gifft dat en Warnen vör Hochwater. Na dat Lannsamt för Ümwelt sünd de Pegels an en poor Stööm as Alster un Bille över dat Wuchenenn üm rund een Meter stegen. Dat Water stiggt noch, de Pegelstänn sünd aver nich problemaatsch, betont en Füerwehrspreker ut Reinbek (Kreis Stormarn).
Dat Wedder för Middeweek, den 25. Februor
An’n Middeweken toeerst faken wulkig bet nevelig-diesig, an’n Morgen hier un dor ringen Nieselregen. In’n Loop vun‘n Dag dröög un vun Süden her Oplockern anners an’n Namiddag bi Opkloren mit Sünn fründlicher. Dat warrt wiederhen luer, Hööchstweerten an de Küsten 7 bet 11 Graad, in’t Binnenland 12 Graad in Leck bet 15 Graad in Holm (Kries Pinnbarg). Swacken, an de Küsten hier un dor in Maten Wind ut südliche Richtungen.
De wiederen Wedderutsichten
An’n Dunnersdag na Nevel wesselnd betruckent, tietwies Sünn, an’n Namiddag bi vele Wulken vun de Westküst her rebeetswies Regenschuer. Hööchstweerten 8 bet 15 Graad. Swacken bet matigen, later böigen, an de Noordsee tonehmen frischen un deels stark böigen Wind ut süüdwestliche Richten.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).