luut & düütlich: Sennen vun Dingsdag
De Sennen "luut & düütlich" vun den 16. Juni to'n Nahören
De Narichten vun den 16. Juni
Ukraine attackeert Raffinerie bi Moskau
Ukrainsche Drahnen hebbt en Raffinerie in de Region Moskau drapen. Den Angreep maak de ukrainsche Präsident Selenskyj in en Social-Media-Post bekannt. De Ukraine harr mit ehr Langstrecken-Anlagen en Maal in 500 Kilometers Afstand attackeert, schreev Selenskyj. Moskaus Börgermeester bekunnt den Angreep op en Öölraffinerie vun de Firma Gazpromneft. Nootfallkräft weern an'n Oort vun den Inslag, Versehrte geev dat keen.
Ne'e Afwehr-Zentrum gegen hybride Drohen apenmaakt
De Sekerheitsbehöörden schüllt enger tosamenarbeiden, üm Düütschland beter vör hybride Bedrohen to schulen. Bunnsbinnenminister Dobrindt hett dorför in Berlin en ne'e Afwehrzentrum apenmaakt. Dor schüllt Polizei un Narichtendeensten Informatschonen bünneln - un ok afstimmen, woans se gegen sone Attacken vörgaht. Dorbi hannelt sik dat to'n Bispeel üm Anslääg op kritische Infrastruktur, Cyber-Attacken oder Desinformatschoonskampagnen. Na Angaven vun de Sekerheitsbehöörden hebbt hybride Bedrohen in de verleden Johren düchtig tonahmen.
Vele Minnerjöhrige schickt intime Biller över dat Handy
In Sleswig-Holsteen stiggt de Tall vun de Fäll, bi de kinnerpornografische Biller un Videos verbredet warrt. Na Angaven vun de Behöörden sünd opfallen veel Minnerjöhrige mang de Daatverdächtigen: In't verleden Johr weren dat meist 40 Perzent vun de üm un bi 2.400 Beschülligten in't Land. Na Polizei un Staatsafkaatschop güng dat bi vele Fäll aver üm dat so nöömte Sexting. Dorbi schickt Kinner un junge Lüüd intime Biller oder Videos vun sik oder Frünnen rüm. Wenn de Biller vun Jungs un Deerns ünner 14 Johren sünd, warrt dat straafrechtlich relevant. De Biller warrt faken vun de Plattformbedrievers as Kinnerpornografie registreert.
Dode bi Exploschoon in Wahnanlaag
In Kropp – süüdlich vun Sleswig – is bi en Exploschoon in en Wahnhuus för öllere Minschen en Mann üm dat Leven kamen. Op sik dat dorbi üm den Meder vun de Wahnung hannelt, weer bi Redakschoonssluss noch nich kloor. Dat Füer is löscht, dat Bowark stört aver licht in. All annern Inwahners kunnen in Sekerheit bröcht warrn, mehre vun de Lüüd kregen Rookvergiften. Worüm dat to de Exploschoon keem, is noch unkloor. Na de Bogenootschop schull de bedrapene Wahnung hüüt rüümt warrn.
VfB Lübeek lagert Profimannschop in Sellschop ut
De Liddmaten vun den VfB Lübeck hebbt mit grote Mehrheit för de Rutnahm vun den Profifootball afstimmt. De Regionalliga-Mannschop schall tokümstig in en egen Sellschop föhrt warrn. Vun den 1. Juli af an övernimmt de nee grünnte VfB Lübeck Fußballspielbetrieb GmbH de weertschopliche un organisatoorsche Verantwoorden för den Regionalliga-Speelbedriev. De Mannschop speelt wiederhen ünner den Naam VfB Lübeck. Achtergrund vun de Besluss sünd blangen de finantschell sworen verleden Johren ok Vörgaven vun dat Finanzamt. Üm de Gemeennüttigkeit vun den Vereen to sekern, müss de weertschopliche Profirebeet vun den indragen Vereen trennt warrn.
Dat Wedder för Middeweek, den 17. Juni
An'n Middeweek gifft dat toeerst mehrstendeels en drögen Wessel ut Sünn un Wulken. In'n Verloop vun den Dag treckt vun de Noordsee her dichtere Wulken op un af un an fallt en beten Regen. De Hööchstweerten liggt bi 18 Graad op Föhr bet 23 Graad in Geesthacht. Dor weiht en swacken bet matigen, an de See to'n Deel böigen Wind, de jümmers mehr op Süüdwest dreiht.
De wiedern Wedderutsichten
An'n Donnersdag wesselt sik Sünnenschien un Wulken af. Enkelte Schuern sünd dorbi, in'n Verloop gifft dat to'n Deel ok Gewidder. Dat warrt warmer bi Hööchstweerten vun 20 bet 27 Graad. Dor weiht en swacken bet matigen, af un an in Böen opfrischen West-, later Süüdwind.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).