luut & düütlich: Sennen vun Dingsdag
De Sennen "luut & düütlich" vun den 9. Juni to'n Nahören
De Narichten vun den 9. Juni
Weltmeren in de Kries na UN-Ozeanbericht
Üm de Ozeanen steiht dat slimm. Wetenschoppers warnt in en Bericht vun de Vereenten Natschonen vör en Kries, de grötter warrt. Dorna warrt de Meren jümmers warmer, de Waterspegel stiggt un de Iesdeck warrt lütter. Dordörch staht de Ökosystemen in de Meren jümmers mehr ünner Druck. De Experten snackt dorvun, dat welk Levensrüüm al över krietsche Kipppunkten weggahn sünd un föddert Politikers nadrücklich to'n Hanneln op.
Mehr polietsch motiveerte Straafdaten un Gewalt
De Tall vun de polietsch motiveerten Straafdaten is noch wieder, üm rund 2 Perzent, stegen. Meist 86.000 Fäll hett de Polizei in't verleden Johr tellt, dat is en ne'en Hööchststand. Bunnsbinnenminister Dobrindt see, dat dorbi ok de Gewaltdaten tonahmen hebbt, näämlich sowull ut de linke as ok ut de rechte Szeen. De gröttste Gefohr güng aver vun den Rechtsextremismus ut. BKA-Präsident Münch wies bi dat Vörstellen vun de aktuelle Statistik op dat Verbreden vun Haat, Hisserie un Propaganda in de sotschalen Medien hen. Dordörch wöörn Radikaliserensprozessen gauer maakt. Togliek stiggt de Bedrohen vun buten, to‘n Bispeel dörch Cyberangrepen, Spionaasch un Sabotaasch.
Na Glücksatlas 2026 is Kiel de glücklichst Grootstadt in Noorddüütschland
Kiel is de glücklichst Grootstadt in Noorddüütschland. De Lannshööftstadt sniedt in't Städer-Ranking vun den ne'en SKL-Glücksatlas ünner de noorddüütschen Grootstäder op't best af un lannt op Platz 5. Kiel hett sik dormit in'n Vergliek to dat Vörjohr düütlich verbetert, 2025 lang dat blots för Platz 12. De Hansestadt Lübeek liggt as ok in't verleden Johr op Platz 18 un Hamborg op den 10. Platz. Dree Johr lang wurrn de Minschen in 40 Grootstäder befraagt, woans se to'n Bispeel de Wahnsituatschoon, Jobs, Kriminalität oder Billens anbotten beweerten doot.
DRK süht dusende Arbeitssteden in Gefohr
Na Angaven vun dat Root Krüüz Sleswig-Holsteen sünd in't Land dusende Arbeitsplätz in Gefohr. Grund is de plaante Kassenreform. DRK-Präsident Torsten Geerdts betekent de Plaans as Frontalangreep op de sotschale Infrastruktur in Sleswig-Holsteen. He is bang, dat vele Steden de stiegen Personalkösten denn nich mehr utglieken köönt. Dat bedröppt to'n Bispeel Noothölps- un Pleegdeensten, Huusnootrööp un Pleeghüüs. Tokümstig schüllt de Kassen Gehaltsverhögen blots noch üm un bi in dat Maat torüchbetahlen, as ok de Versekerten Lohntowass kregen hebbt.
Iraansche Fans warrt WM-Korten wegnahmen
De Iraansche Footballverband klaagt, dat de Fans ut dat Land dat Korten-Kontingent för de tokamen Football-WM wegnahmen worrn is. Dormit kunnen Anhängers, de al Reisplaans maakt harrn, de Spelen vun ehr Mannschop nich besöken. Vele iraansche Footballfans harrn de bet nu offitschelle Ankünnigen vertruut. Op welk Besluss sik de Verband betüggt, is nich kloor. Dat gifft noch keen Menen vun den Weltfootballverband FIFA oder de WM-Gastgevers USA, Mexiko un Kanada.
Dat Wedder för Middeweek, den 10. Juni
An'n Middeweek is dat süüdlich vun den Kanal toeerst faken dröög, to'n Deel is dat ok hell. Sünst wesselt sik Wulken af, af un an schient de Sünn, dorto gifft dat tietwies Regenschuern un ok enkelte Gewidder. De Hööchstweerten liggt bi 17 Graad in Langenhoorn (Noordfreesland) bet 19 Graad an'n Schaalsee. Dor weiht en swacken bet matigen un böigen, an de See ok frischen un stark böigen Wind ut Süüdwest bet West.
De wiedern Wedderutsichten
An'n Donnersdag sünd vele Wulken an'n Heven, verbunnen mit en beten Sünnenschien gifft dat af un an Schuern, in enkelte Fäll ok Gewidder. An enige Stellen blifft dat ok länger dröög. Woll to Nacht hen treckt an de Noordsee dichtere Wulken un Regen op. Hööchstweerten 16 bet 18 Graad. Dat weiht en swacken bet matigen, an de Noordsee vun'n Avend an opfrischen Süüdwestwind.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).