luut & düütlich: Sennen vun Donnersdag
De Sennen "luut & düütlich" vun den 22. Oktober to'n Nahören
De Narichten vun den 22. Oktober
Selenskyj klaagt över ne'e Angrepen
De ukrainsche Präsident Selenskyj hett wedder över massive Angrepen op Kiew un anner Regionen klaagt. Selenskyj verkloor wöörtlich, siet den Avend harrn de russ'schen "Humanisten" dree Wellen vun ballistische Attacken op de Hööftstadt afschaten. Dat geev twee Dode un vele Versehrte. De Präsident snack vun en demonstrativen Slag na de Verhanneln vun güstern. Dorbi harr US-Verhandler Witkoff in St. Petersborg Kremlbaas Putin drapen. Witkoff nööm Putin in düssen Rahmen en „Humanisten“, also en Minschenfründ.
BSI hett na PHP-Sekerheitslock noch keen Schadens utmaakt
Dat Sekerheitslock in de veeltiets bruukte Programmeerspraak PHP hett apenbor noch keen Schadens anricht. Dat Bunnsamt för Sekerheit in de Informatschoonstechnik hett na egen Angaven noch keen Fäll faststellt, bi de Hackers de Laag utnütt hebbt. Man dat ganze Utmaat kunn eerst in en poor Daag düütlich warrn. De Viezpräsident vun dat Bunnsamt för Sekerheit in de Informatschoonstechnik, Caspers, reep in de ARD de Bedrievers vun Internettsieden op, de praatstellden Sekerheits-Updates foorts to installeren. Ahn de ne'e Verschoon is de Gefohr dor, in korte Tiet doch bedrapen to ween.
Diesel-Tankrabatt kummt nich kumplett an
De aktuelle Tankrabatt kummt na en Ünnersöken bi Benzin meist kumplett bi de Autofohrers an, bi Diesel aver blots to'n Deel. Na dat ifo-Institut weer Diesel liekers dat Rünnersetten vun de Stüer üm 17 Cent in'n Snitt blots so bi 14 Cent billiger. Bi Super E5 weern dorgegen de vullen 17 Cent wietergeven worrn. Dormit wöör sik dat Beleevnis mit den eersten Tankrabatt ut dat Vörjohr wedderhalen, heet dat vun dat ifo-Institut.
Europääsche Wildkatt in Sleswig-Holsteen sicht
De europääsche Wildkatt is torüch in Sleswig-Holsteen. En Jäger hett dat Deert tohoop mit sien Nawass mit sien Wildkamera in en Wooldrebeet in'n Kreis Hertogdom Loonborg sehn. Eerst in't verleden Johr weer to'n eersten Maal na lange Tiet wedder en Wildkatt in Sleswig-Holsteen dörch en Gen-Test nawiest worrn. Egentlich gellt de europääsche Wildkatt in't Land as utstorven.
Keen Sieg för düütsche Clubs in de Champions League
In de Football-Champions-League hett de FC Bayern wedder en Sieg verpasst. De Mönkeners kemen an'n drüdden Speeldag vun de Ligaphaas gegen den engelschen Meester FC Arsenal nich över en 2:2 rut. RB Leipzig verloor bi Real Madrid mit 1:4. Mit de twete Nedderlaag un blots een Sieg staht de Sassen in de Champions League al ünner Druck.
Dat Wedder för morgen, Friedag, den 23. Oktober
An'n Friedag wulkenwesselig bet dicht betrocken, to'n Deel en beten Sünn un toeerst faken dröög. Över den Dag kummt vun de Elv her jümmers wedder en beten Regen op. Hööchstweerten 10 Graad in Sleswig bet 12 Graad in Grotenbrood. De Süüdoostwind weiht faken matig, an de See frisch bet stark un an de Westküst sünd ok stöörmsche Böen mööglich.
De wiedern Wedderutsichten
An'n Sünnavend treckt bi vele Wulken vun'n Süüdwesten her Regen in Form vun Schuern dörch, na'n Avend hen gifft dat denn noch dröge un fründliche Afsneed. Hööchstweerten 11 bet 13 Graad. De Wind weiht to'n Deel swack, faken aver matig bet frisch mit starke Böen. He dreiht vun Süüd un Oost op West bet Süüdwest, an de See sünd af un an stöörmsche Böen dorbi. Woans sik de Wind nipp un nau wiesen deit, is noch nich ganz seker.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).