luut & düütlich: Sennen vun Donnersdag
De Sennen "luut & düütlich" vun den 16. Juli to'n Nahören
De Narichten vun den 16. Juli
Wedder Angrepen op Kiew
Dat russ’sche Militär hett Kiew in de verleden Nacht wedder mit Raketen angrepen. Dorbi sünd na Angaven vun de ukrainschen Behöörden tominnst twee Minschen üm’t Leven kamen. In en Lager un in en unbewahnt Huus sünd na Angaven vun Kiews Börgermeester Klitschko Bränn utbraken. Na de ukrainsche Luftwapen schoot dat russ’sche Militär in twee Wellen tominnst acht Raketen op de ukrainsche Hööftstadt af.
Wooldbrand in’n Müritz-Natschonalpark breedt sik ut
De Wooldbrand in’n Müritz-Natschonalpark hett sik noch wieder utbreedt. Middewiel hebbt ok de Toppen von de Bööm anfungen to brennen. Dat Füer breedt sik dorüm nu in de Hööch ut. Dör den dichten Boombestand in’n Natschonalpark köönt Funken licht vun Topp to Topp överspringen. De Wooldbrand in’n Müritz-Natschonalpark hett sik middewiel op meist 320 Hekter Flach utbreedt. Mehr as 500 Insatzkräft gaht gegen de Flammen gegenan.
Grundwaterstänn siet in Neddersassen
In Neddersassen roopt de eersten Landkreisen to’t Watersporen op. Wegen siede Grundwaterstänn is dat in’n Landkreis Stood nu verbaden, den Rasen to sprengen oder dat Auto to waschen. Dat Versorgen is na de Waterversorgers un Kommünen nich in Gefohr. Aver na wekenlange Dröögnis warrt de Grundwaterstand opstunns an meist jede twete vun de 161 Meetsteden in’t Land as "sehr siet" inornt. Güstern harr Ümweltminister Meyer en "Masterplaan Water" vörstellt. Dormit will dat Land gegen en Watermangel as ok Gefohren vun Hoochwater un Versmudden vun’t Water gegenanarbeiden.
Slecht afstellte Elektorrullers as Problem för Blinne un Sehbehinnerte
Wiel vele blinne oder sehbehinnerte Minschen de op Footpadden afstellten E-Scooters to laat oder man slecht kennen doot, föddert de Blinnen- un Sehbehinnertenvereen Sleswig-Holsteen mehr extra Afstellzonen för E-Scooters. In Kiel gifft dat de al. De Stadt Pinnbarg will na egene Angaven bald en passlich Richtlien dorto rutbringen.
Twete Apentlichkeitdeelnahm för ne’en Regionalplaan Windenergie start
Vun hüüt an köönt Menen to de överarbeiden Windkraftplaans vun’t Land inlangt warrn. Plaant sünd in‘t ganze Land knapp 400 Vörrangrebeden för Windenergie op meist dree Perzent vun de Lannsflach. En eerste Vörslag woor na meist 3.000 Torüchmellen wedder ännert. Binnenministerin Magdalena Finke (CDU) bedank sik för de velen konstruktiven Henwiesen. Dordörch harrn de Plaans "nascharpt" un in vele Details verbetert warrn kunnt. Menen sünd bet to’n 26. August mööglich.
Schaap ahn Bedöven in Noordfreesland slacht
Kontrolleuren hebbt op en Hoff in’n Kreis Noordfreesland mehre Mannslüüd bi’t Slachten vun Schaap faatkregen – ahn Bedöven, as dat Lannslabor middewiel bekunnt hett. De Staatsafkaatschop Flensborg ünnersöcht gegen fief Mannslüüd wegen den Verdacht op en Straafdaat na dat Deertenschuulgesett. Bi de Dörchsöken an’n 27. Mai dropen Polizei un Veterinäramt de Mannslüüd in en Stall an. Na Angaven vun de Ünnersökers trocken se jüst en Schaap dat Fell af, en tweet Deert verblödd dör en Kehlsnitt. De Beamten stoppen dat Slachten un sekern de doden Deerten.
Dat Deertenschuulgesett schrifft dat Bedöven vör, dat Wehdaag un Lieden vermieden deit. De Verdacht: Op den Hoff passeer dat wedderhaalt nich. Utlööst harr dat allens en Henwies ut de Inwahnerschop.
Lisa Baum ut Ahrensböök is de ne’e Rekord-Transfer vun de Froens-Bunnsliga
De 19 Johr ole Butenstörmerin Lisa Baum wesselt för en Friekoopgeld in’n hogensössstelligen Rebeed vun RB Leipzig to’n FC Arsenal. Dat is de hööchste Summ, de jemals för en Spelerin ut de Froens-Bunnsliga betahlt woor. Na Medienberichten betahlt de Spitzenclub vun de engelsche Women's Super League meist 600.000 Euro Friekoopgeld för dat Talent, dat in Sleswig-Holsteen opwussen is un bi’n HSV utbillt woor – dat is en ne’e Bestmark.
Dat Wedder för Freedag, den 17. Juli
An’n Freedag en Wessel ut vele Wulken un ok en beten Sünn, dorbi ok stark betrocken Afsneed. Eerst stellenwies, in’n Loop vun den Dag öfter Regenschuern un Gewidder, deels kräftig, öörtlich mit Starkregen un Hagel. Hööchstweerten 23 Graad in Westerland bet 26 Graad in Ratzborg, deels licht doröver. Afsiets vun Schuern un Gewidder weiht en swacke Wind ut ünnerscheedliche Richten, an de Noordsee is de Wind matig un dor denn later op Noordwest dreihen.
De wiedern Wedderutsichten
An’n Sünnavend mehr Wulken as Sünn, eerst in’n Oosten un Süüdoosten, later vun de Noordsee un däänsche Grenz her stellenwies Schuern, enkelt wat grummelig. Twüschendörch lange Tiet dröög. Hööchstweerten18 bet 21 Graad. Tonehmen matige as ok böige bet stark böige Noordwest- bet Westwind, an de See frische bet starke mit stöörmsche Böen, an de Noordsee sünd later enkelte Stormböen mööglich.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).