luut & düütlich: Sennen vun Donnersdag
De Sennen "luut & düütlich" vun den 18. Juni to'n Nahören
De Narichten vun den 18. Juni
USA minnern stantepee Kapazitäten för de NATO
De USA ehr Plaans, minner Suldaten, Wapen un Logistik för de NATO to stellen, gellt nu glieks. Dat hett de NATO-Generalsekretär Rutte to’n Anfang vun dat Drapen vun de Verdedigungsministers vun dat Militärbund fastmaakt. Na Rutte sien Ansicht bedüüdt dat för de Europäers, dat se sik noch mehr anstrengen mööt, üm bi en afschrecken Indruck to blieven. Konkret geiht dat üm dat NATO-System, dat gau Truppenverleggen in’n Fall vun en Aggression oder en Angreep regelt. In dat System is fastleggt, welk Liddmaatstaten wo veel Kräft un Vermögen praat hollen doot un wo gau düsse dor sien mööt. De USA wüllt ehr Bidrääg bannig minnern.
EU-Topp beraadt över Ümgang mit China
De Afsichtsverkloren för en Kriegsenn in’n Iran warrt ok Thema op den EU-Topp ween, de an’n Avend in Brüssel anfangt. Bi dat Toppdrapen warrt dat aver woll ok üm den tokümstigen Ümgang mit China gahn – versteken achter den Punkt op de Dagsornen "globale weertschoppliche Rutföddern". Hannelskommissar Sefcovic hollt en Neestart in de Hannelskontakten mit Peking för nödig. De EU-Kommischoon smitt China ünner annern vör, de egen Ünnernehmen mit ümfaten Staatshölpen to föddern un se dordörch en unfairen Vördeel in’n Wettstriet mit europääsche Firmen to verschaffen.
Twee düütsche Scheep op’n Weg in dat Rode Meer
Düütschland hett twee Scheep mit meist 140 Suldatinnen un Suldaten an Boord in dat Rode Meer schickt. Se schüllt en mööglichen Militärinsatz in de Straat vun Hormus vörbereden, as Verdedigungsminister Pistorius hüüt fröh mitdeel. Dat Mienensöökboot "Fulda" un dat Versorgens-Schipp "Mosel" hebbt den Suezkanal passeert un schüllt nu binnen de kamen fief bet söven Daag dat Rode Meer dörchdweren. Maal weer vöreerst en Haven in dat oostafrikaansche Dschi buti. Pistorius stell ok kloor, dat sik Düütschland blots an en Mienenrüümakschoon in de Straat vun Hormus bedeligt, wenn de Iran un de Oman een so en Mischoon tostimmt.
Teihndusende Fans reist to’n Hurricane-Festival an
Teihndusende Musikfans warrt wedder in dat neddersass‘sche Scheeßel verwacht. Dor finnt an düt Wekenenn dat Hurricane Festival statt. Vele vun de 78.000 Besökers reist al hüüt an. Dorüm mutt mit vulle Straten rund üm den Oort un in den Kreis Rotenburg rekent warrn. De Veranstalters bereidt sik butendem op de ankünnigte Hitt un jüstso op Gewidder un Starkregen vör. Dat Hurricane Festival fiert in düt Johr sien 30-jöhrig Bestahn. Mehr as 90 Bands un Künstlers treden op. Dorto höört to’n Bispeel Kraftklub, The Offspring, Clueso un Natasha Bedingfield.
Sleswig-Holsteensche Landdag fiert 80-jöhrig Jubiläum
De sleswig-holsteensche Landdag hett sik an Middeweekavend mit en Festakt an sien Grünnen vör 80 Johren besinnt. Meist 500 laden Gäst in dat Kieler Slott fiern, wat 1946 passeer: En vörlöpig Landdag un en vörlöpig Verfaten för Sleswig-Holsteen weern afsnackt worrn. De wichtigsten demokraatschen Regeln weern dormals fastleggt. Bi den Festakt güstern hebbt Redners düütlich maakt, dat de parlamentoorsche Demokratie ok hüüt noch verbetert warrn kunn, aver liekers dat Beste is, wat dat gifft, dormit Börgers in Freeheit leven köönt.
Noordfresen fiert 600 Johr Siebenhardenbeliebung op Föhr
De noordfreesche Gemeenschop hett an Middeweek den 600. Johrsdag vun de Siebenhardenbeliebung in Wyk op Föhr fiert. An’n 17. Juni 1426 schreven de Noordfresen in de St. Nicolai-Kark in Boldixum dat eerste Mal ehr Rechten op, so dat Nordfriisk Instituut. An düssen histoorschen Oort organiseer dat Instituut nu en Festakt mit middelöllerliche Musik un Dänz vun den Wyker Trachtenvereen. För Projektmitarbeiterin Henriette Boysen sünd de Fierlichkeiten to’n Johrsdag en Statement dorför, dat ok lokale Gemeenschoppen ehr Tosamleven ünner sik regeln köönt. De Fresen streven dormals na Autonomie gegenöver den däänschen König. Söven Verwaltensbezirken, nöömt Harden, harrn sik 1426 överleggt, "wat jem beleevt" - dorher de Naam Siebenhardenbeliebung.
Vörbereden för Veerlanden-Triathlon lopen
Swümmen, Radfohren, Lopen – üm un bi 1.300 Minschen nehmt an’n Sünndag an’n 29. Veerlanden-Triathlon deel. Sorgen maakt de Organisatoren de Radstreck – ok wegen den Sabotage-Akt bi den Ironman vör een Week. Apenbor mit Willen op de Straat smeten Metallsplitters maken Löcker in de Radslauchen vun veel Athletinnen un Athleten. Welk störten un versehren sik, annere verloren veel Tiet. De Organisatoren vun den Veerlanden-Triathlon güngen dorüm in’n Vörweg mit Anwahners un Bedrieven in’t Gesprääk: „Wi versöökt Querungsmööglichkeiten to schaffen, dormit de Bedrieven anfohrt warrn köönt un nich vun ehr Ümsätz aflaten mööt. Villicht maakt dat den Ünnerscheed“, hööpt Organisatorin Astrid Kirsch.
Dat Wedder för Freedag, den 19. Juni
An Freedag blangen tietwies Sünnenschien ok wulkige Phasen. Dorbi toeerst vun West na Oost dörchtrecken Regenschuer oder Gewidder, mitünner kräftig, later meist dröög. Mehr un mehr bruddig, Hööchstweerten 29 Graad in Flensborg bet 33 Graad in Elmshorn, an de See 23 bet 28 Graad. Swacke bet matige Wind ut süüdliche Richten mit Schuer- un Gewidderböen.
De wiedern Wedderutsichten
An Sünnavend hell, deels wulkig, dorto Schuer un öörtlich deels starke Gewidder. Bruddig bi Hööchstweerten von 27 bet 32 Graad, in dat Küstenümfeld 23 bet 27 Graad. Swacke bet matige Wind ut ünnerscheedliche Richten mit Schuer- un Gewidderböen.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).