luut & düütlich: Sennen vun Donnersdag
De Sennen "luut & düütlich" vun den 12. Mart 2026 to'n Nahören
De Narichten vun den 12. Mart
Lange Haftstrafen för Anslag op Moskauer Konzerthall
Twee Johren na den Anslag op en Konzerthall in Moskau hett en Gericht in de russ'sche Hööftstadt de veer Anklaagten to levenslange Haft veroordeelt. De Angriepers ut Tadschikistan harrn dorna an'n 22. Mart 2024 in de "Crocus City Hall" in en Moskauer Vöroort op de Besökers schaten. 149 ((eenhunnertnegenunveertig)) Minschen sünd doot bleven. Blangen de Hööftdäders kriegt ok ölven Komplizen levenslange Haftstrafen. De Anslag op de Konzerthall in Moskau gellt as de slimmste op russ'schen Grund siet 20 Johren. Ofgliek sik de Terrororganisatschoon IS to de Daat bekenn, vermood de russ'sche Regeren ukrainsche Kräft achter den Anslag. Kiew streed af, wat dormit to doon to hebben.
Grimme-Priesen gaht an ZDF, ARD un RTL2
De Grimme-Jury hett wedder en poor düütsche Feernseh-Produkschonen uttekent. Teihn Grimme-Priesen güngen an dat ZDF - dorünner för de besünnere journalistsche Leisten vun de Reportersche Golineh Atai för Berichten ut de araabsche Welt. De ARD kreeg fiev Grimme-Priesen, ünner annern för den Krimi "Die Nichte des Polizisten", produzeert för SWR un NDR. In de Kategorie Kinner un Jöögd wunn de NDR-Produkschoon "Grüße vom Mars". To'n eersten Maal güng en Grimme-Pries ok an den Privatsenner RTL2. Hier övertüüg de Dokumentatschoon "Hass.Hetze.Hoffnung" över anti-asiaatschen Rassismus un den Moord an en chinees'sche Studentin in Dessau de Jury.
Tall vun de Photovoltaikanlagen stiggt
In Düütschland stiggt de Tall vun de Solaranlagen wieder. To't Johrsenn 2025 weern op Däker un Grundstücken knapp 4,8 Millionen Photovoltaikanlagen installeert. Dat hett dat Statistsche Bunnsamt mitdeelt. Dormit nehm de Tall vun de Anlagen gegenöver dat Vörjohr üm knapp 18 Perzent to. De Anstieg is aver toletzt en beten ringer worrn. Tellt warrt all Photovoltaikanlagen, de wat to de apentliche Versorgen in de Netten inleiden doot . Lüttere Anlagen, as to'n Bispeel de sonöömten Balkonkraftwarken, fallt in de Regel nich dorünner.
Dode junge Mann in Eckernföör
In Eckernföör is an'n Middeweekavend en junge Mann na en Gewaltdaat storven. Dat deel de Polizei Kiel mit. Dorna schall sik de Daat gegen vidde l vör negen afspeelt hebben. Vör en Supermarkt in de Eckernföörer Binnenstadt schall en Striet twüschen mehre Personen eskaleert ween. Korte Tiet later funnen Beamten knapp 2,5 Kilometer wieder weg en swoor versehrten Jungkeerl . Se leisten eerste Hölp un reanimeren em. Op den Weg in't Krankenhuus schall he an sien Versehren storven ween, deel de Polizei mit. De Söök na de Däders verleep dorna ahn Resultaat. Ok worüm dat bi den Striet gung, is noch unkloor.
Fruen-DFB-Pokaal: Halvfinaal-Spelen staht fast
In’n DFB-Pokal vun de Fruens sünd de Spelen för dat Halvfinaal utloost worrn. En fröhed Duell twüschen de Favoriten FC Bayern München un VfL Wulfsborg gifft dat nich. De Fruens vun Bayern München dörvt sik över en Heimspeel gegen de SGS Essen freuen. De VfL Wulfsborg mutt utwarts ran un speelt gegen Carl Zeiss Jena. De Halvfinal-Spelen warrt an’n 4. un 6. April speelt. Dat grote Final in Köln gifft dat denn an’n 14. Mai.
Dat Wedder för Freedag, den 13. Mart
Morgen an'n Freedag wesselt sik dat toeerst af, in'n Loop vun'n Dag treckt de Heven aver jümmer mehr to un warrt dicht wulkig. Vun de Noordsee her kummt denn ok Regen op. In'n Süüdoosten blifft dat länger dröög un de Sünn kiekt ok mal rut. De Hööchstweerten liggt bi 7 Graad in Westerland bet 13 Graad in Lübeck. De Wind weiht matig bet frisch ut Süüdwest bet West un bringt starke bet stöörmsche Böen mit. Op de Noordfreeschen Inseln sünd to Anfang ok Stormböen mööglich, later lett de Wind denn na.
De wiederen Wedderutsichten
An'n Sünnavend wiest sik de Heven wulkenwesselig, deels gifft dat en beten Sünn, aver af un to sünd ok Schuern mööglich. Hööchstweerten 6 bet 10 Graad. De Wind weiht swack ut West bet Noordwest.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).