luut & düütlich: Sennen vun Freedag
De Sennen "luut & düütlich" vun den 13. Mart 2026 to'n Nahören
De Narichten vun den 13. Mart
Veer US-Suldaten bi Afstört in’n Irak doot bleven
Bi den Afstört vun en amerikaanschen Tankfleger in’n Irak sünd veer vun de söss Maten vun de Mannschop ümkamen. Dat US-Militär snack vun en Unfall. De Maschien weer nich afschaten worrn. En twete Maschien, de in den Vörfall verwickelt ween weer, weer seker lannt. Dorgegen deel de pro-iraansche Kämpers in’n Irak mit, se harrn den Tankfleger mit en Rakeet afschaten.
Merz gegen Lockern vun de Russland-Sankschonen
Kanzler Merz hett sik dorgegen utspraken, Sankschonen gegen Russland to lockern. Tovör harrn de USA bekannt geven, dat se för en korte Tiet den Verkoop vun russ’sch Eerdööl wedder tolaten. Se reageert dormit op den Öölpries, de siet Anfang vun den Iran-Krieg stiggt. Merz see dorgegen bi sien Besöök in Norwegen, dat geev in’n Ogenblick en Priesproblem, keen Mengenproblem.
Tall vun de Insolvenzen klattert op hööchsten Stand siet 2014
In’t verleden Johr sünd in Düütschland wedder mehr Ünnernehmen insolvent gahn as in’t Vörjohr. Mit üm un bi 24.000 Fäll weern dat in’t Johr 2025 so vele Insolvenzen as siet teihn Johren nich mehr. Dat hett dat Statistsch Bunnsamt mitdeelt. An’n dullsten drapen weern de Rebeten Verkehr as ok dat Gast- un Bowarv.
Knapp 10.000 Bööm op de Dieken vun de Eider mööt wieken
Op de Dieken an de Eider schüllt in de tokamen Johren dusende Pappeln fällt warrn, as de Eider-Treene-Verband mitdeelt hett. Drapen sünd de Dieklinjen twüschen Lexfähr un de Slüüs Noordfeld in’n Kreis Dithmarschen. De Behörden begrünnt dat mit de Sekerheit vun de Dieken. Na dat Lannswatergesett dörven op Dieken keen Bööm stahn, wenn se de Dieksekerheit in Gefohr bringt. Grote Pappeln köönt in’n Storm ümstörten oder mit ehr Wuddeln den Diekkörper swack maken. De Eider-Treene-Verband vermoodt, dat langs de Ünnereider tominnst 10.000 Pappeln staht. In de tokamen teihn Johren schüllt de na un na wegnahmen warrn. De Naturschuulorganisatschoon BUND warnt vör en Kahlslag langs de Eider un wiest op den Weert vun ole Bööm för de Veelfoolt vun de Oorden un de Landschop hen.
Düütschland haalt eersten Sieg in‘n Para-Ieshockey siet 20 Johren
De düütsche Para-Ieshockey-Natschonalmannschop hett bi de Paralympics in Mailand un Cortina en histoorschen Sieg fiert. In en dramaatsch Speel gegen de Slowakei wunn dat Team an't Enn mit 4:3 in de Verlängern. Dat weer de eerste Sieg bi de Paralympics siet 20 Johren. De grote Held vun dat Speel weer Felix Schrader, de för all veer Doren för Düütschland verantwoortlich weer. Nu geiht dat för Düütschland an'n Sünnavend in't Speel üm Platz fiev gegen den Gastgever Italien.
Dat Wedder för Sünnavend, de 14. Mart
Morgen an’n Sünnavend wiest sik de Heven faken wulkig un af un to gifft dat Regen. Na Noordfreesland hen blifft dat faken dröög un de Heven lockert ok mal op, so dat de Sünn rutkieken kann. Dat warrt köhler as toletzt: De Hööchstweerten liggt bi 6 Graad op Fehmarn bet 9 Graad in Elmshoorn. De Wind weiht swack, deels ok matig, un kummt ut ünnerscheedliche Richten.
De wiederen Wedderutsichten
An’n Sünndag is dat na öörtlichen Nevel hell bet wulkig un de meiste Tiet vun’n Dag dröög. To‘n Anfang kann dat in’n Süüdoosten vun’t Land ok mal en lichten Schuer geven. De Hööchstweerten liggt bi 7 bet 11 Graad. De Süüdwestwind weiht swack bet matig, an’n Avend frischt he an de Noordsee böig op.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).