luut & düütlich: Sennen vun Freedag
De Sennen "luut & düütlich" vun den 8. Januor 2026 to'n Nahören
De Narichten vun den 9. Januor
Moskau füert Hyperschall-Rakeet op Ukraine
Russland hett bi sien anhollen Angrepen op de Ukraine na egen Angaven en twetet Mal en nee oordige Hyperschall-Middelstreckenrakeet insett. Na Angaven vun dat Wehrministerium wurrn se op en strateegsche Maal affüert; Details wurrn nich mitdeelt. De Insatz vun de Hyperschall-Rakeet weer as Reakschoon op en ukrainschen Anslag op en Residenz vun den russ‘schen Präsidenten Putin schehn, heet dat wieder. Of dat so en Anslag aver würklich geven hett, warrt internatschonal antwiefelt. De ne‘e Hyperschall-Rakeet "Oreschnik" kann na russ‘sche Angaven üm un bi 12.000 Kilometer in de Stünn gau warrn un ok Atomwapen dragen.
SPD-Frakschoon will Blievrecht för bestimmte Inwannerers
De Bunnsdagsfrakschoon vun de SPD befaat sik an'n tweten Dag vun ehr Klausurdagfohrt vundaag ünner annern mit de Migratschoonspolitik. Op den Disch leeg en Beslussvörlaag, wona all Inwannerers en Blievrecht kriegen schüllt, de sik an düütsche Gesetten hoolt un hier en Arbeit nagaht. En Thema mehr is de Arvschopsstüer. Hier will de SPD-Frakschoon winnen, dat Bedrieven good wiederföhrt un Arbeitssteden dordörch langfristig bewohrt warrt.
Prozess gegen "White Tiger" hett anfungen
In Hamborg gung vundaag de Prozess gegen en schienboren Pädokriminellen los, de ünner den Foren-Naam "White Tiger" bekannt worrn is. De 21-Jöhrige mutt sik vör dat Landgericht wegen Mord un fieffachen versöchten Mord verantwoorden. He schall psychisch labile Jungdeerns un Jungkerls över dat Internet dorto brocht hebben, sik sülvst to versehren. En 13-Jöhrige schall Suizid begahn hebben. Tosamen warrt den Anklaagten mehr as 200 Straafdaten to Last leggt, de he as Kopp vun en internatschonale Grupp vun Cyberkriminellen twüschen 2021 un 2023 begahn hebben schall.
Bommenentschärpen an'n Sünndag in Wedel
An'n Sünndag warrt in Wedel in'n Kreis Pinnbarg en Tünner vun een Bomm afboot . Üm un bi 6.000 Minschen mööt na Angaven vun de Stadt ehr Hüüs un Wahnungen bet Klock Ölven verlaten. De 250 Kilogramm swore amerikaansche Flegerbomm wurr in'n Oosten vun de Stadt in't Industrierebeet funnen. Vörher harrn Experten vun den Kampmiddel-Rüümdeenst al vermoodt, dat dor en Blindgänger liggen kunn.
Konzertsaal an't Kieler Slott maakt wedder op
Na veereenhalf Johr Bosteed maakt an't Wekenenn dat Konzerthuus an't Slott in Kiel wedder op. Sünnerlich de Technik in dat as Denkmal schuulte Gebüüd ut de Sösstiger-Johren wurrn moderniseert, deel de Stadt Kiel mit. Ünner annern schall dör ne‘e Akustikplaten an de Deek de Klang beter ween. De wohrschienlichen Kosten belopen sik op 43 Millionen Euro. An'n Sünnavend gifft dat dat Anfangskonzert. Dorbi speelt dat Philharmonsche Orchester Kiel Wagner un Uttöög ut Beethovens 9. Sinfonie "Ode an die Freude". För Sünndag is en Dag vun de apen Döör plaant.
Dat Wedder för Sünnavend, de 10. Januor
An’n Sünnavend hellt sik dat op bet stark bedeckt, af un an wiest sik de Sünn, vun Noorden un vun de Oostsee her hier un dor Sneeflagen mit Glattheit, öörtlich ok kräftig utfallend. In manche Rebeden länger dröög . Höögstweerten bi -5 Graad in Loonborg an de Elv bet 0 Graad op Sylt un Fehmarn. Matige bet frische Oost- bet Noordoostwind mit starke bet stöörmsche Böen, an de See to’n Anfang stark bet stöörmsch Wind mit Stormböen, later wat nalatend. An de Oostsee högere Waterstänn, eerste Dagshälft mit Stormflootgefohr!
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).