luut & düütlich: Sennen vun Friedag
De Sennen "luut & düütlich" vun den 23. Oktober
De Narichten vun den 23. Oktober
Finnland verlöövt Atom-Endlager
Finnland warrt wohrschienlich as dat eerste Land en Endlager för Atommüll in Bedriev nehmen. Helsinki hett den Bedriev vun dat weltwiet eerste Endlager för afbrennte Brennelementen verlöövt. An dat Lager ünner de Eer in Süüdwestfinnland is 22 Johren lang boot worrn. Dat schall bald in Bedriev gahn. Bet to 6.500 Tunnen Uran schüllt dor rinpassen. Dacht is dat Lager för den Müll ut fief finnsche Atomkraftwarken. De bruukten Brennelementen warrt in Kopper inslaten un in Löcker versenkt, de denn mit Beton dichtmaakt warrt. Se sünd noch för mehre dusend Johren hoochradioaktiv.
Ünnersöken wiest europawiet 50.000 Dode wegen de Hitten in'n Sommer
Wegen extrem hoge Temperaturen in Europa sünd in düssen Sommer na en Ünnersöken mehr as 50.000 Minschen dootbleven. En Grootdeel vun de Doodsfäll weer op den Klimawannel trüchtoföhren, heet dat in de Analyys vun brietsche Foorschers, de in dat Fackblatt „Nature Health“ rutgeven worrn is. De Wetenschoppers hebbt för de Ünnersöken to de Överstarvlichkeit dörch de Hitten Daten ut mehr as 850 stäädsche Rebeden in 27 EU-Staten as ok Grootbritannien, Norwegen un de Swiez utweert. De Tall vun Doden dörch de Hitten leeg dorna in düssen Sommer düütlich höger as in de Rekordsommers 2022 un 2003.
Mehr Extremisten mit Verlööf för Wapen
In Düütschland hebbt tominnst 1.600 Extremisten en Wapenschien. Dat is bi en Ünnersöken vun'n NDR rutkamen. De Tallen kaamt ut de Binnenministerien vun de Bunnslänner un betreckt sik op dat Johr 2025. Dorna geev dat 100 Verlöven mehr as in't Johr dorför. Vun de 1.600 Personen mit en Wapenschien tellt de Behörden rund 1.300 to dat rechtsextreme oder dat Rieksbörger-Spektrum. En lütteren Deel seht de Behörden as Linksextremisten, Islamisten oder radikale Dweerdenkers an. Vör twee Johren harr de Bunnsregeren dat Wapenrecht egentlich verscharpt, mit dat Maal, dat dat eenfacher warrt, Extremisten en Wapenschien wedder wegtonehmen.
ADAC warnt vör falsch instellte Autoschiensmieters
De ADAC un de Lannsverkehrswacht in Sleswig-Holsteen roopt Autofohrers dorto op, ehr Licht to kuntrulleren. Denn bi den bunnswieden Licht-Sicht-Test in't verleden Johr harr na en Ünnersöken mehr as jeed veerte Auto Mangeln. De ADAC warnt: Falsch instellte Schiensmieters köönt to en Sekerheitsrisiko warrn.
Düütsche Mannschop speelt in Serbien ahn Tokiekers
Dat Nations-League-Speel vun de düütsche Football-Natschonalmannschop in Serbien an'n 13. November finnt kumplett ahn Tokiekers statt. De europääsche Footballverband UEFA hett Serbien to en sonöömte „Geisterspeel“ veroordeelt. De Grund sünd rassistsche Vörfäll vun de serbschen Fans in de letzten Spelen. Todem mutt de serbsche Verband 50.000 Euro Straaf betahlen. Ok de düütschen Fans dörvt bi de Partie nich in dat Stadion in Belgrad rin. De DFB see in en Schrieven an de Anhängers, se harrn sik för de Fans en betere Naricht wünscht.
Dat Wedder för morgen, Sünnavend, den 24. Oktober
An'n Sünnavend treckt bi vele Wulken vun'n Süüdwesten her Regen dör. Na den Avend hen warrt dat ok mal dröög un dat kloort op. De Hööchstweerten sünd 12 Graad in Bad Oschloe bet 13 Graad in Büsum. De Wind weiht to'n Deel swack, oft aver matig bet frisch, in Böen ok stark. De Wind dreiht vun Süüdoost över Noord op West bet Süüdwest. An de See sünd toeerst un an'n Avend stöörmsche Böen, op de Noordsee-Inseln denn ok sogor Stormböen mööglich.
De wiedern Wedderutsichten
An'n Sünndag dichte Wulken mit Regen oder Starkregen, de över dat Hartogdom Loonborg aftreckt. Hier un dor sünd ok Blitz un Donner mööglich, dorto gifft dat aver ok dröge Afsneed. Hööchstweerten 12 bet 14 Graad. De Wind ut Süüd bet West weiht matig bet frisch, tietwies ok stark. In Böen is de Wind stark bet stöörmsch. An de See gifft dat hier un dor ok swore Stormböen. An de Westküst sünd later sogor Orkanböen mööglich! Dor besteiht de Gefohr vun en Stormfloot.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).