luut & düütlich: Sennen vun Maandag
De Sennen "luut & düütlich" vun den 2. Mart 2026 to'n Nahören
De Narichten vun den 2. Mart
Israel un Iran maakt wieder mit gegensiedige Angrepen
Israel un Iran hebbt sik ok hüüt gegensiedig angrepen. De iraanschen Revolutschoonsgarden deel mit, se harrn Tel Aviv, de Havenstadt Haifa un Oost-Jerusalem in’t Viseer nahmen. Vun dor sünd ok mehre Exploschonen meldt worrn. Israel dorgegen hett wedder Malen in‘n Iran angrepen. Butendem hett dat Militär den Libanon bombardeert, üm dor de mit Iran verbünnte Hisbollah-Miliz to drepen. De Hölpsorganisatschoon Rode Halvmaan bericht ünnerdes, dat siet Anfang vun de israelsch-amerikaanschen Luftangrepen in‘n Iran tominnst 550 Minschen doot bleven sünd.
Kanzler Merz reist na Washington
Merrnmang de Eskalatschoon vun den Krieg in den Neegen Oosten reist Kanzler Merz hüüt na Washington. Dor will he morgen mit US-Präsident Trump snacken. De jüngsten amerikaanschen un israelschen Angrepen op Iran warrt dat Drepen domineren. Merz hett güstern över de Angrepen snackt. He beteken se as nödig, üm dat – so wöörtlich – toschannen maken Speel vun dat Regime in Teheran to Enn to bringen. Düütschland is jüst so as de anner NATO-Verbünnten vun de USA nich an de Militärslääg gegen Iran bedeligt.
Vele Touristen sitten in‘n Neegen Oosten fast
In‘n Neegen Oosten töövt opstunns üm un bi 30.000 düütsche Touristen dorup, na Huus torüch to kamen. Se sitt fast, wiel de Luftruum wegen de Angrepen op Iran un de Gegenslääg in vele Oorloffslänner in de Region slaten is. Vele Floogsellschoppen hebbt ehr Verbinnen dorhen so un so streken. Reisveranstalters röppt ehr Kunnen to Vörsicht op. Bedrapenen schüllt de Anwiesen vun de öörtlichen Behöörden folgen un nich op egen Fuust to Flooghavens oder in Naverlänner reisen. Dat Butenministerium süht opstunns keen Mööglichkeit, düütsche Staatsbörgers na Huus to halen.
Mehr Liddmaten in Kinnerfüerwehren in Sleswig-Holsteen
In Sleswig-Holsteen sünd jümmers mehr Kinner Liddmaat bi en Kinnerfüerwehr. Luut Lannsfüerwehrverband sünd de Tallen siet Corona üm twee Drüttel anstegen: vun 1.100 Liddmaten in‘t Johr 2022 op 1.800 Liddmaten in‘t verleden Johr. Dorbi lehrt de Söss- bet Teihn-Jöhrigen to’n Bispeel, wodennig se en Nootroop richtig afsetten oder wat se doon köönt, wenn dat brennt. För Sebastian Schneemann, de bi’n Lannsfüerwehrverband för de Kinnerafdelen tostännig is, sünd de Kinnerfüerwehren en Spoodmodell. Besünners freut em, dat de Deerns-Andeel in de Kinnerafdelen bannig groot is – un dat düsse Deerns-Andeel denn ok mit in de Jöögdafdelen övergeiht.
Hanfmann verpasst eersten ATP-Titel in Santiago
Tennisprofi Yannick Hanfmann hett sien eersten Titel op de ATP-Tour ok in’n drütten Anloop verpasst. De Karlsruher verloor dat Final in Santiago de Chile gegen den Italiener Luciano Darderi mit 6:7 un 5:7. Liekers dörv Hanfmann dat Turneer as Spood verboken: In’t Halffinal harr he unvermodens den op Platz een setten Argentinier Francisco Cerúndolo bedwungen. In de Weltranglist kladdert Hanfmann nu vun Platz 81 op 65. Wieder geiht dat för em bi dat Masters in Indian Wells, dor mutt he aver in de Qualifikatschoon.
Dat Wedder för Dingsdag, de 3. Mart
An‘n Dingsdagmorgen is dat noch wat nevelig, aver denn warrt dat faken schöön un de Sünn lett sik sehn. Later treckt vun Noorden her en poor Wulken op, dat blifft aver överall dröög. De Hööchstweerten liggt an de Noordsee bi 7 bet 10 Graad, in’t Binnenland warrt dat warmer: vun 11 Graad in Schafflund bit to 15 Graad in Groothansdörp. De Wind weiht eerst swack bet matig ut Süüd un dreiht later op Noordwest bet Noord.
De wiederen Wedderutsichten
An’n Middeweek sünd na den Nevel eerstmal wedder Wulken an’n Heven, an de Oostsee kann dat ok Hoochnevel geven. Anners warrt dat en fründliche Dag mit veel Sünnschien un dat blifft verbreedt dröög. De Hööchstweerten liggt an de See bi 7 bet 10 Graad, sünst bi 10 bet 12 Graad. De Wind weiht swack bet matig un dreiht op ööstliche Richten.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).