luut & düütlich: Sennen vun Maandag
De Sennen "luut & düütlich" vun den 9. Februor 2026 to'n Nahören
De Narichten vun den 9. Februor
Gericht in Hongkong veroordeelt Jimmy Lai to 20 Johren Haft
In Hongkong is de Demokratie-Aktivist Jimmy Lai to 20 Johren Haft veroordeelt worrn. De Anklaag seggt Verswören mit butenlandsche Kräft un Rutgeven vun opröhrsche Schriften. Minschenrechtler, aver ok föhren westliche Politikers, hebbt den Prozess veroordeelt. Kritikers seht em as een Teken mehr för den Afbu vun Pressfreeheit un Freeheitsrechten. De brietsche Staatsbörger Lai sülvst betekent sik as polietschen Fungenen.
BSW klaagt gegen Resultat vun de Bunnsdagswahl
Dat Bündnis Sahra Wagenknecht will vör dat Bunnsverfatensgericht gegen dat Resultat vun de letzte Bunnsdagswahl klagen. De Partei stellt vundaag de dorto nödige Besweer för de Wahlpröven vör. För den Intog in den Bunnsdag fehlten in’t verleden Johr rund 9.500 Stimmen. Dat BSW maakt dorför Fehlers bi dat Uttellen verantwoortlich un foddert en Nee-Uttellen. Bet nu bleven rechtliche Schreed man ahn Spood.
Jümmers weniger Tähndokters in Sleswig-Holsteen
In Sleswig-Holsteen gifft dat jümmers weniger Tähndokterpraxen. Dat wiesen Tallen vun de Kassentähndokterliche Verenigung Sleswig-Holsteen. De Versorgen schall man nich in Gefohr sien, heet dat. Dormit sik junge Tähndokters vör allens ok op‘n Land daallaten doot, foddert de Verenigung vun de Politik, de Rahmenbedingen to verbetern.
46-Johrigen in Niemünster dootmaakt
In Niemünster hett de Polizei an’n Sünndag en Mann fastnahmen, wiel he en 46-Jöhrigen dootmaakt hebben schall. Gegen Klock veer in de Fröh harr na Polizei en Anwahnersch in de Färberstraat de Beamten ropen, wiel dat dor ogenschienlich en gewaltsamen Striet geven harr. Polizisten funnen en swoor versehrten 46-jöhrigen Mann. De is korte Tiet later in’t Krankenhuus storven. Noch an’n Vörmiddag hett de Polizei en 26-Jöhrigen fastnahmen, de ünner Daatverdacht steiht. De Achtergrünn vun de Daat sünd unkloor.
Seahawks winnt Super Bowl gegen de Patriots
De Seattle Seahawks sünd de Winners vun den sösstigsten Super Bowl. In dat Finaal vun de US-Football-Liga NFL hett de Mannschop in Santa Clara (Kalifornien) düütlich mit 29 to 13 gegen de New England Patriots wunnen. De Patriots mit ehrn jungen Speelmaker Drake Maye harrn gegen de starke Verdedigen vun Seattle meist keen Chanc’ un kregen in de eerste Halftiet keen Punkten tostann. To’n besten Speler vun de Partie is de Löper Kenneth Walker wählt worrn.
Dat Wedder för Dingsdag, den 10. Februor
An Dingsdag wulkig bet betrocken un mehrstendeels dröög, later regional Opkloren mööglich, to’n Avend vun de Elv un Noordsee her wedder mehr Wulken un opkamen Regen. Hööchstweerten bi 1 Graad in Hilligenhaven bet 4 Graad in Wedel. Swacke, an de See matige süüdööstliche Wind.
Un nu de wiederen Wedderutsichten
An Middeweek dicht betrocken un neven dröge Phasen männichmol wat Regen, to’n Anfang deelwies wat froren. Hööchstweerten 2 bet 5 Graad. Swacke bet matige, an de See matige bet frische Wind ut ööstliche Richten.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).