luut & düütlich: Sennen vun Maandag
De Sennen "luut & düütlich" vun den 15. Juni to'n Nahören
De Narichten vun den 15. Juni
Iran un USA enigt sik op Rahmenafkamen
De USA, de Iran un Vermiddler Pakistan hebbt en vörlöpige Övereenkamen för en Enn vun den Krieg bekannt geven. As US-Präsident Trump verkloor, warrt na dat Ünnerschrieven an'n Friedag de Blockaad vun iraansche Havens dör de US-Marine ophaven. Butendem schall de för den Welthannel wichtige Straat vun Hormus wedder apen ween. En afslaten Afkamen ünner annern över dat iraansche Atomprogramm un över en mööglich Enn vun Sankschonen schall in de tokamen 60 Daag uthannelt warrn.
Mehr as 600 Drahnen bi Angrepen op de Ukraine
Bi swore Angrepen op de Ukraine hett Russland na Angaven vun de ukrainsche Luftwapen mehr as 600 Drahnen insett. De Attacken vun de verleden Nacht konzentreren sik na dat Militär op de Städer Kiew, Charkiw un Dnipro; tominnst teihn Minschen sünd storven. In de ukrainsche Hööftstadt brenn de Hööftkark vun dat beröhmte Höhlenklooster; dat höört to dat Unesco-Weltkulturarv. De russ'schen Behöörden mellt dree Dode na en ukrainschen Drahnenangreep op de Stadt Tula süüdlich vun Moskau.
Hubig will Extremisten vun't Schöppenamt utsluten
Bunnsjustizministerin Hubig will verhinnern, dat Rechtsextremisten as Schöppen in düütsche Gerichtssalen mit Recht spreken doot. Wokeen för de Justiz arbeiden deit, müss mit beide Fööt op den Bodden vun de freeheitlich demokraatsche Grundornen stahn, see Hubig to dat "Redakschoonsnettwark Düütschland". Dorüm will de Bunnsjustizministerin de Wahl vun Schöppen un ehr Denkwies to de Verfaten klorer regeln. De Rechtsextremismus weer de gröttste Gefohr för de Demokratie; de Rechtsstaat müss för den Ümgang mit Feenden vun de Verfaten starkt warrn, see Hubig.
"Vertell doch mal": Winnerinnen un Winners staht fast
In't Ohnsorg-Theater in Hamborg worrn Sünndagmiddag de Siegerinnen un Siegers vun den plattdüütschen Schrievwettstriet "Vertell doch mal" uttekent. De 38. (achtundörtigste) Oplaag vun de Akschoon vun den NDR, Radio Bremen un dat Ohnsorg-Theater stünn ünner dat Motto "Kuddelmuddel". Autor Rainer Martens ut Gaarn (Kreis Noordfreesland) beleggt mit sien Text "WG-Waschdag" den eersten Platz. He kriggt 1.500 Euro Priesgeld. Jüstso wiet vörn sünd twee wiedere Sleswig-Holsteners: Alina Jacobs ut Flensborg kriggt den tweten Pries, Christine Buettner ut Wedel (Kreis Pinnbarg) lannt op Platz fiev. Mitmaakt hebbt üm un bi 500 Autorinnen un Autoren.
Straalsunder Basketballspeler Ariel Hukporti as drüdde düütsche NBA-Champion
De Straalsunder Ariel Hukporti hett mit de New York Knicks den Titel in de noordamerikaansche Basketball-Profiliga NBA wunnen. In de Nacht to'n Sünndag haal de 24 Johr ole Center mit sien Team in de Finalserie "Best of seven" gegen de San Antonio Spurs den veerten Sieg, de den Utslag för den Titel geev.
Dat Wedder för Dingsdag, de 16. Juni
An'n Dingsdag wesselt sik Sünn un Wulken af, dat is ok mol dull betrocken. In de mehrst Regionen blifft dat dröög, blots in enkelte Fäll un för korte Tiet fallt en beten Regen. De Hööchstweerten liggt bi 16 Graad in Klanxbüll bet 20 Graad in Mölln. Dor weiht en swacken bet matigen, an de See mehrstendeels matigen Wind ut westliche Richten.
De wiedern Wedderutsichten
An'n Middeweek toeerst mehrst drögen Wessel ut Sünn un Wulken. In'n Verloop vun den Dag treckt vun de Noordsee her dichtere Wulken op un af un an fallt en beten Regen. De Hööchstweerten vun Noord na Süüd 19 bet 23 Graad. Dor weiht en swacken bet matigen, an de See to'n Deel böigen Wind, de jümmer mehr op Süüdwest dreiht.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).