luut & düütlich: Sennen vun Middeweek
De Sennen "luut & düütlich" vun den 21. Oktober to'n Nahören
De Narichten vun den 21. Oktober
Musk schall Starlink-Minnern anornt hebben
In'n russ'schen Angreepskrieg is de Ukraine dull vun Informatschonen ut de USA afhangig. Man dorbi hett dat toletzt Problemen geven, vör allens mit den Satellitendeenst Starlink. Na Medienberichten schall de Besitter Elon Musk verleden Week anornt hebben, de Version vun Starlink to minnern, de vun dat ukrainsche Militär bruukt warrt. As dat „Wall Street Journal“ mit Henwies op Informatschonen ut de US-Regeren bericht, harr Musk de Anornen vörher mit US-Präsident Trump besnackt. Trump harr dorgegen verkloort, he wöör sik sülvst un ok Musk nich för den Utfall vun den Starlink-Togang verantwoortlich hollen. Middewiel schall de Ukraine wedder op de Satelliten-Daten togriepen könen.
Eerdopwarmen warrt na UN de Kalkulatschonen överdrepen
De Eerdopwarmen warrt in'n Loop vun dat Johrhunnert wohrschienlich de bet nu gülligen Kalkulatschonen överdrepen. Na en ne'e UN-Vörutsaag stüert de Eer mit de aktuelle Klimapolitik op en Opwarmen vun 2,8 Graad to'n Enn vun't Johrhunnert to - in'n Vergliek to de vörindustrielle Tiet. Dorbi maakt jeedeen lütten Deel vun en Graad över 1,5 Graad dat Risiko för Floten, lange Hitten un Wooldbränn grötter, heet dat ut dat UN-Ümweltprogramm. Dat de Vörutsaag so düüster utsüht, liggt na den Bericht vör allens doran, dat sik de USA vun de Plaans för den Klimaschuul verafscheedt hebbt. De UNO rekent in den Bericht jeed Johr ut, wo groot de Differenz is twüschen de Utstööt, de to verwachten sünd, un de Weerten, de nödig weren, üm to de Malen vun dat Pariser Klimaschuulafkamen to kamen.
Tietschrift "Emma" warrt instellt
Meist 50 Johren na de eerste Utgaav warrt dat feministsche Magazin „Emma“ instellt. Dat hett de Rutgeverin Alice Schwarzer künnig maakt. Dorna warrt de Utgaav in'n Dezember de letzte ween. Weertschoppliche Grünnen harr de Besluten nich. „Wi sünd matt“, see Schwarzer wöörtlich. Digital schall „Emma" aver wieder bestahn. Dat eerste Stück weer an'n 26. Januor 1977 rutkamen. Dat Magazin seeg sik sülvst as feministsch Spraakrohr merrn in en Medienlandschop, de vun Mannslüüd domineert wöör.
Grootinsatz in't Hallenbad in Weissenhäuser Strand
Füerwehr un Noothölpskräft sünd an'n Middeweekavend to en Grootinsatz in en Ferienzentrum in Weißenhäuser Strand (Kreis Oostholsteen) utrückt. Dor harrn Kinner över Luftweegbeswoornissen klaagt. Jümmers mehr Minschen mellen sik in de Tiet vun den Insatz mit Problemen. Toletzt sünd na de Füerwehr mehr as 120 Personen ünnersöcht worrn. Twee sünd behannelt worrn. De Insatzkräft hebbt dat Hallenbad ünnersöcht, kunnen aver keen Grund för dat Lieden finnen.
Swore Opgaven för düütsche Teams in de Champions League
An'n drüdden Speeldag vun de UEFA Champions League hett Borussia Dortmund güstern bi Sabah FK en wichtigen 2:1-Utwartssieg haalt. Garant för den Sieg bi den Vereen ut Aserbeidschan weer Serhou Guirassy, de beide Dortmunder Doren maakt hett. De VfB Stuttgart muss sik gegen Atletico Madrid mit een Punkt tofreden geven. Stuttgart keem nich över en 1:1 gegen dat Team vun Trainer Diego Simeone rut, ofschoonst se in de twete Halftiet in Övertall weren. Op de annern beiden düütschen Mannschopen in de Champions League töövt hüüt an'n Avend swore Opgaven: RB Leipzig mutt bi Real Madrid antreden, de FC Bayern München speelt to Huus gegen Arsenal London. Beide Spelen gaht üm Klock negen los.
Dat Wedder för morgen, Donnersdag, den 21. Oktober
An'n Donnersdagmorgen treckt de Regenwulken in'n Oosten gau af. Denn blifft dat dröög un blangen dichte Wulken gifft dat ok en beten Sünnenschien, ehr later vun de Noordsee her Schuern opkaamt. Hööchstweerten 12 Graad in Plöön bet 14 Graad in Sankt Peter-Ording. De Süüdwestwind weiht matig bet frisch mit starke Böen. An de Noordsee sünd ok enkelte Stormböen mööglich.
De wiedern Wedderutsichten
An'n Friedag wulkenwesselig, to'n Deel en beten Sünn un af un an Regen. Hööchstweerten 11 bet 13 Graad. Oft matige, an de See frische bet starke un an de Westküst in Böen stöörmsche Süüd- bet Süüdoostwind.
De Rechten vun düsse Sennen liggt bi Kiel FM / de mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).