Nedderdüütsch in‘t Radio un in’t Nett: PLATTform geiht op Sennen
Ünner dat Motto „Medien mit Wietsicht" start uns ne‘e Nedderdüütsch-Projekt dörch: De PLATTform is dat Dack för verscheden mediale Formaten op Plattdüütsch – en halve Stünn Radiosennen mit Nahrichten, en Online-Magazin as ok Social-Media-Bidrääg
In de nedderdüütsche Szeen warrt op den Start vun de ne‘e Nedderdüütsche Medienplattform siet Maanden henfevert – un to't ne‘e Johr is dat nu endlich sowiet. Ünner den Naam PLATTform geiht 2026 en ne‘e Format an den Start.
Karn vun de PLATTform warrt en ne‘e Radioformat, wat Maandag bet Sünnavend en halve Stünn över den Apen Kanal Sleswig-Holsteen sennt warrt. De Geschichten, Stimmen un Bidrääg to relevante Themen ut dat Weltschehen un de Region schöölt sünnerlich ok junge Lüüd anspreken.
Vun Maandag bet Freedag warrt in de Sennen „luut & düütlich" över wichtige Begevenheiten vun den Dag reflekteert , an't Wekenenn gifft dat in de „Wekenschau" en korten Blick torüch op de Week. To dat mediale Anbott warrt Bidrääg op de Websteed un op de bestahn Social-Media-Kanals vun den SHHB rutgeven.
Ne'es Redaktschoonsteam insett
Dat ne‘e Moderatschoonsteam vun de Radiosenn billt Alina Dwenger (28) un Karsten Tolle (42). Beide ergänzt sik wunnerbor un kiekt mit veel Vörfreud, man ok en beten Opregen op ehr ne‘e Opgaav: „Dat Modereren vun Radiosennen is en heel ne’e Erfohren för mi, aver mit de plattdüütsche Spraak bün ik bannig vertruut, denn dormit bin ik groot worrn. Dorüm freu ik mi dull, mien Moderspraak to mien Beroop to maken", seggt Alina Dwenger.
För Karsten ‚Kadde' Tolle, de toletzt negen Johr as Pressspreker för den Sleswig-Holsteenschen Footballverband togang weer, warrt denn al ehr dat Modereren op Nedderdüütsch to'n Aventüer: „As ik vun dat Projekt wies worrn bün, weer ik glieks Füer un Flamm. Hier kann ik mien Begeistern för Spraak un Spraken mit mien Kenntnis in’t redakschonelle Arbeiden verbinnen“, seggt he.
„Dat Maal un de wichtige Opdrag vun de Medienplattform is wiederhen ok de Utbo vun de nedderdüütsche Spraak un de Ümsetten vun unsen Sprakenplaan“, seggt SHHB-Geschäftsbaas Benjamin Abel.
Ok vun de Siet ut de Politik warrt de ne’e Medienplattform begrööt: „Mit dat Anbott kümmt en aktuelle Bühn för Plattdüütsch in de Medien. [...] Höörbor, sichtbor un tokumstricht", freut sik Johannes Callsen, de Beopdraagte för Minnerheiten vun den Ministerpräsidenten, över dat ne‘e Projekt vun den SHHB.
PLATTform hören un sehen
De Radiosennen kann dääglich över DAB+, UKW, de Livestreams vun den OKSH or achteran online höört warrn.
Dat Projekt warrt vun de Medienanstalt Hamborg/Sleswig-Holsteen (MA HSH) mit Geller vun dat Land föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).