Loccumer Trilogie
Düt is dat letzte Book vun Johann Dietrich Bellmann (1930 – 2006) – un dat is Literatur vun’t Feinste.
En Geschenk an all de Plattdüütschen, so hett mal een seggt. De Schoolmeister un Theoloog ut Nindörp bi Buxthuu is een vun de besten plattdüütschen Schrieverslüüd – un dorüm is he nu ok al dat drütte Mal bi uns Literaturtipps to finnen.
Sien Figuren sünd Minschen ut düsse Welt: Senta, de Ehebrekersch – Angelika, de Unschüllige – Michael, de verloren Söhn. De Geschichten speelt op en olen Hoff in Loccum, dor, wo Hiestermann wahnt, den se ümsiedelt hebbt. Achter de Vertellens över de Minschen staht jümmers düsse Fragen: Dörvt wi vergeten? Is Besinnen en Sünn? Is Vergeven de Saat vun’t Nich-Vergeten? De Trilogie gifft uns Anters un stellt uns noch mehr Fragen. Un nadenken schullen wi denn an’t Enn ok noch. Mehr köönt wi uns nich wünschen vun gode Literatur.
Bellmann, Johann Dietrich: Loccumer Trilogie.
Krummbek: Plaggenhauer 2009. 157 S.
To kriegen bi den Online-Bookhannel Plattschapp för 19,90 €