luut & düütlich: Sennen vun Middeweek
De Sennen "luut & düütlich" vun den 14. Oktober to'n Nahören
De Narichten vun den 14. Oktober 2026
Noord-Stream Perzess in Hamborg is anfungen
Düsse Sabotaaschakt hett in de düütsche Nakriegsgeschicht wohl de gröttste Opmarksamkeit kregen – dat Sprengen vun de Noord-Stream-Pipelines vör mehr as veer Johr. Hüüt is in Hamborg en eersten Perzess anfungen. Anklaagt is en Ukrainer. Folgens Bunnsafkaatschop weer he de Bass vun en Koppel ut söven Lüüd, de de Gasrohren in de Oostsee sprengt hebben schüllt. De Mann weer to de Tiet Offizeer vun en ukrainsche Sünnereenheit. Dorüm is en vun de wichtigsten Fragen, of de 50-Jöhrige in‘n Opdrag vun de ukrainsche Regeren hannelt hett, oder nich.
Forschensschipp "Polarstern" torüch in Bremerhoben
De Forschungs-Iesbreker "Polarstern" is hüüt morgen vun sien letzten Arktis-Insatz düssen Sommer na Bremerhoben trüchkamen. Bi de teihnwekige Expeditschoon na den Noordpol weren goot veertig Forscherinnen un Forschers dorbi. Folgens dat Alfred-Wegener-Institut güng dat dorüm, geoloogsche Daten ut de verleden Tiet to sammeln, um betere Prognosen för de Tokumst maken to könen. De "Polarstern" warrt nu wedder op Schick bröcht un heelmaakt. Midd November geiht de neegste Expeditschoon los un twoors in Richt hen na de Antarktis.
Bunnskabinett beslütt Gesettvörlaag to Zuckerstüer
För wisse Saken to Drinken mit Zucker binnen fallt woll bald extra Stüern an. De Bunnsregeren hett en Gesettvörslag dorto beslaten. Plaant is, dat de Stüer vun tokamen Sommer af an gellt – för Drinken, daat tominnst fief Gramm Sucker per hunnert Milliliter hett. 26 Cent oder mehr schüllt denn bavento anfallen. För sonöömte Zero-Limonaden gellt dat – anners as twüchendörch dacht – nich. De hess‘sche Ministerpräsident Rhein vun de CDU hett de Stüer tovör as verkehrt Signal bekrittelt – wiel de Levenskösten sounso al so hooch weren.
Hackerangreep op Bostell vun den Fehmarnbelt-Tunnel
Op de Boarbeiden an den Fehmarnbelt-Tunnel hett dat en Cyberangreep geven. As de Medien vermellt, hebbt Hackera en Sekerheitslück funnen un kunnen so an all IT-Systemen rankamen. Nu funkschoneert to’n Bispeel Togangskoorten nich mehr. Wokeen achter den Cyberangreep stickt, is nich kloor. De Fehmarnbelt-Tunnel ünner de Oostsee schall goot achtteihn Kilometer lang warrn un de däänsche Insel Lolland mit Fehmarn verbinnen.
Nato-Öven op Kreta mit Suldaten ut Sleswig-Holsteen
Op Kreta öövt de Bunnswehr düsse Week mit scharpe Raketen vun en nee Floogafwehrsystem. Mit dorbi sünd bummelig 280 Suldaten ut Husum (Kreis Noordfreesland) un ut Todendörp (Kreis Plöön). Dat deelt de Bunnswehr mit. De in Düütschland konstrueerte Technologie hett de Ukrain al mit Spood gegen russ‘sche Raketen bruukt. De Nato-Öven geiht Friedag toenn, all in all sünd 500 düütsche Suldatinnen un Suldaten bedeligt.
Dat Wedder för Donnersdag, den 15. Oktober
An’n Donnersdag gifft dat blangen Wulken ok en bedden Sünnschien, na Noordwesten hen is dat allgemeen wulkiger, anners warrt dat över Dag fründlicher un dat blifft ok meisttiets dröög. Hööchstweerten 15 Graad in Süderlügum bet 18 Graad in Elmshoorn. Dat weiht en swacke bet matige, an de Noordsee deels frische Süüd- bet Süüdwestwind.
De wiedern Wedderutsichten
An’n Friedag vele Wulken, twüschendörch wat Sünn un in’n Loop vun de Noordsee her opkamen Regenschuern, in’n Süüdoosten länger dröög. Hööchstweerten 16 bet 19 Graad. Dat weiht en swacke bet matige Wind, de vun Südwest op Noordwest dreiht.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).