luut & düütlich: Sennen vun Middeweek
De Sennen "luut & düütlich" vun den 12. August to'n Nahören
De Narichten vun den 12.08.2026
Meta in Kalifornien vör Gericht
In de USA fangt hüüt en Prozess gegen Meta an - den Modderkunzern vun Instagram un Facebook. Meta warrt vörsmeten, mit sien Plattformen Kinner un junge Lüüd afhängig un psyychsch krank to maken. Veer Bunnsstaten verlangt, dat Funkschonen as dat unendliche Scrollen un vele Narichten vun de Plattformen sülvst dull verminnert warrt. Butendem föddert se en Straaf vun bet to 1,2 Billionen Euro - en Summ, de meist so hooch is as de Börsenweert vun Meta. Mit en Oordeel warrt to'n Anfang vun'n Oktober rekent.
Mehr Befoognissen för Geheemdeensten
De Bunnsregeren hett en groote Reform vun de düütschen Geheemdeensten beslaten. Dat Kabinett hett en Vörlaag vun Bunnsbinnenminister Dobrindt tostimmt. Verfatensschuul un Bunnsnarichtendeenst schüllt dormit in Tokumst in bestimmte Fäll aktiv gegen Angriepers angahn könen, staats se blots to beluern. De Bunnsdag mutt de Reform noch tostimmen. Butendem bröch dat Kabinett de sonöömte Fröhstart-Rent för Kinner op'n Weg; jüstso as en hardere Vörgahn gegen Finanzkriminalität un Geldwäsch.
Prozesanfang na Messangreep in Niemünster
Vör dat Lannsgericht Kiel mutt sik vun hüüt an en 46-jöhrige Fru wegen versöchte gefährliche Liefversehren verantwoorden. Na Angaven vun de Staatsafkaatschop schall se in en Inkoopszentrum in Niemünster op en Mann instaken hebben. De Fru schall na de Anklaag in'n Februar mit en 21 Zentimeter lange Mess op em instaken hebben. De Mann bleev unversehrt, wiel he en dicke Jack an harr. De Staatsafkaatschop geiht dorvun ut, dat de Fru to de Tiet vun de Daat nich schulddüchtig weer. Na dat Gericht hannelt sik dat üm en sonöömte Sekerheitsverfohren. En Oordeel warrt to'n Enn vun'n September verwacht.
Husumer Havendaag gaht los
Hüüt gaht in Husum in'n Kreis Noordfreesland de Husumer Havendaag los. Bet Sünndag gaht de Veranstalters na egen Angaven vun Dusende Besökerinnen un Besökers ut. Dat is dorna dat gröttste Volksfest an de Westküst. Ünner annern warrt op dree Bühnen Livemusik anbaden. De Stadtlienen vun HusumBus fohrt na egen Angaven an'n Friedag un Sünnavend länger un kost nix. Butendem gifft dat för de Besökerinnen un Besökers kostenfre'e Park-and-Ride-Plätz an dat Messfeld.
DFB büddt wedder Stahplätz bi Lännerspelen an
To'n eersten Maal siet mehr as 25 Johren gifft dat bi Spelen vun de düütsche Football-Natschonalmannschop wedder Stahplätz. As de DFB mitdeel, gifft dat de Premieer bi de eersten Huusspelen vun Bunnstrainer Jürgen Klopp - an'n 27. September in Augsborg gegen Grekenland un an'n 1. Oktober in Mönken gegen Serbien. Stahplätz schüllt dat nu bi de Lännerspelen vun de Mannslüüd, de Fruenslüüd un bi de U21 geven. Na Utkumst vun DFB-Präsident Neuendorf is dormit en Wunsch vun vele Fans wohr maakt worrn. De Stahplatz-Koorten för de neegsten Nations-League-Spelen kost 18 Euro.
Dat Wedder för Morgen, Donnersdag den 13. August 2026
An'n Donnersdag gifft dat meist vun fröh bet laat sünnige un dröge Wedder. Blots hier un dor wiest sik för korte Tiet en poor dünne Wulken. Dat warrt warmer bi 23 Graad an'n Fehmarnsund, 26 Graad op Amrum un bet to 30 Graad in Wedel. De Wind weiht swack, an de Küsten to'n Deel ok matig ut Oost bet Süüdoost
De wiedern Utsichten
An'n Friedag wiest sik af un an de Sünn, in'n Verloop treckt vun Westen her hoge Wulkenfeller op, man dat blifft dröög. De Hööchstweerten sünd 30 bet 34 Graad, an de See 27 bet 31 Graad. To'n Deel gifft dat en starke Warmslast. De Wind weiht swack bet matig ut Süüdoost bet Süüd.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).