luut & düütlich: Sennen vun Middeweek
De Sennen "luut & düütlich" vun den 25. Februor 2026 to'n Nahören
De Narichten vun den 25. Februor
Hungersnoot in Somalia droht to eskaleren
In Somalia droht de Hungersnoot to eskaleren. Davör wohrschaut mehre internatschonale Organisatschonen. So mellt dat Welternährenprogramm WFP, dat in dat Land 6,5 Millionen Minschen vun Hunger bedroht sünd. Dormit hett sik de Tall binnen een Johr verdubbelt. Grünnen sünd dorna Överswemmen, Dröögten, unophöörliche Kunflikten, Krankheitsutbröök, en hoge Düernisrate un en drastichen Rüchgang vun internatschonale Hölpsgeller. Midderwiel harrn al 200 Kliniken un Gesundheitinrichten in Somalia sluten warrn müsst, vertellt de Hölpsorganisatschonen.
Staatsdefizit höger as dacht
De Löcker in den düütschen Staatshuushoolt 2025 sünd grötter as toeerst meent. Dat Defizit vun Bund, Länner, Gemeenden un Sotschalversekern leeg betrocken op de Weertschopsleisten bi 2,7 Perzent, as dat Statistische Bunnsamt mitdeelt hett. Op vörlöpige Basis harr de Behörde dat Minus noch op 2,4 Perzent fastleggt. Grund för den Anstieg is en högere Weertschopsleisten in dat veerte Quartal. Düütschland heel liekers de europääsche Verschuldensregel in, de en Huusholtsdefizit vun hööchstens dree Perzent verlööft.
Sleswig-Holsteen foddert strengere Antisemitismus-Strafen
Na ne’e antisemitische Vörfäll in Kiel un bi de Berlinale snackt Sleswig-Holsteen sien Ministerpräsident Daniel Günther (CDU) vun en tonehmen Radikaliseren in Düütschland. He will sik dorüm op de kamen Ministerpräsidentenkunferenz Anfang Mart för strengere Strafen insetten. Mit en Beslussvörslag will Sleswig-Holsteen den Bund ünner annern dorto opfoddern, Haat un Hisserie gegen Jüdinnen un Juden as ok gegen Israel as besünners sworen Fall vun Volksverhetzung intoornen. Dat Mindeststrafmaat müss spöörbor höger sett warrn, heet dat wieder.
Plan för Noothölp vun de Eutiner Festspele
En Kunzertsommer in Eutin (Kreis Oostholsteen) schall ogenschienlich de Eutiner Festspele utglieken. Dat hett de Eutiner Hööftutschuss an’n Avend beslaten. Vör söss Weken harr de ehrenamtliche Geschäftsföhrer de Eutiner Festspele afseggt. Dat Programm schall nu vun dat Sleswig-Holsteen Musikfestival (SHMF) op de Been stellt warrn. Dat schall al Vörslääg geven. De langfristige Lösen: En ne’e Dochtersellschop vun de Stadt Eutin schall grünnt warrn, de de Festspele af den Sommer 2027 utricht. Woans dat betahlt warrn kann un wokeen as Andeelseegner instiegen künn – dorto schall de Stadtverwalten nu en Kunzept utarbeiden.
THW Kiel un SG Flensborg-Handewitt in de European League
De THW Kiel un de SG Flensborg-Handewitt blievt na den tweten Hauptrunnen-Speeldag in de European League op Kurs Veertelfinale. De THW verdedigt de Tabellenföhren mit en 37:32-Sieg in dat spaansche Irun. De SG sett sik mit 40:35 gegen Montpellier in Frankriek dör.
Dat Wedder för Donnersdag, den 19. Februor
An’n Dunnersdag na Nevel afwesselnd bedeckt, vör allen in’n Süüden un Süüdoosten tiewies Sünn. Anners in’n Verloop vun’n Dag vun de Westküst un Noordfreesland her mehr Wulken un enkelte Schuer, süüdlich vun’n Kanal faken dröög. Hööchstwerte knapp 6 Graad op Sylt, 10 Graad in Flensborg bet 15 Graad in Wentorf bi Hamborg, in’n Nevel köhler. Swacken bet matigen, later böigen, an de Noordsee tonehmen frischen un deels stark böigen Wind ut Süüd bet Süüdwest.
De wiederen Wedderutsichten
An’n Freedag wulkig bet stark bedeckt un vun Westen her tiewies Regen, vörher ganz in’n Süüdoosten an de Anfang meist dröög mit Chancen op en beten Sünn. Hööchstwerte 6 bet 15 Graad. Swacken bet matigen un böigen, an de See frischen un stark böigen Süüdwestwind, in frie Lagen stöörmsche Böen.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).