luut & düütlich: Sennen vun Dingsdag
De Sennen "luut & düütlich" vun den 13. Oktober to'n Nahören
De Narichten vun den 13. Oktober
Schipp na Drahnenangreep vör Bulgarien ünnergahn
Vör de bulgoorsche Swattmeer-Küst sünd wedder twee Scheep vun Drahnen drapen worrn. Een is na Angaven vun Regerensböversten Radev ünnergahn. Een Maat kunn sik redden – wovele Minschen an Boord weren, is nich kloor. Dat Schipp höör to de Ukrain un fohr ünner malteesche Flagg. Eerst verleden Week hebbt Drahnen Schaden maakt an twee Frachters, een vun de Scheep is ünnergahn. Wo de Drahnen herkamen sünd, dat is nich kloor. Bulgarien hett de EU un de Nato üm Stütt bi‘t Ünnersöken beden.
IWF gifft ne‘e Weertschopsprognoos för Düütschland rut
De düütsche Weertschop warrt folgens den Internatschonalen Betahlmiddelfonds düütlich mehr wassen as dacht. As de Organisatschoon mitdeelt hett, schall dat Weertschopswassdom mit 1,3 Perzent nu meist duppelt so stark ween as noch in‘n Juli verwacht. För tokamen Johr rekent de Fachlüüd mit 0,1 Punkten mehr as betnu. Ok de Eurozoon warrt folgens IWF beter vörankamen as dacht. Mit Blick op de Weltweertschop rekent de IWF eerst tokamen Johr wedder mit en grötter Wassdom. Vörutsetten dorför is man, dat sik de Laag in den Negen Oosten normaliseert, denn de hogen Energiepriesen belast de Weltweertschop. Positiv op de anner Siet wiest sik, dat veel Geld in Künstliche Intelligenz investeert warrt.
Böötööl weer in’n September 75 Perzent dürer
Dörch de hogen Energiepriesen hett de Inflatschoonsandeel in Düütschland dat eerste Maal siet dree Johr de Mark vun dree Perzent överschreden. Dat Statistische Bunnsamt hett sien Överslag bekunnt, na den Woren un Deensten in’n September 3,3 Perzent mehr köst hebbt as noch een Johr tovör. Gröttste Priesdriever verleden Maand weer dat Böötööl, dat meist 75 Perzent dürer weer as in dat Johr dorvör. Sprit köst 37 Perzent mehr as in’n Vörjahrsmaand. Meist nich dürer worrn sünd Levensmiddel: Hier sünd de Priesen blots üm 0,4 Perzent anstegen. Botter, Spiesööl un Aavt sünd in‘n Johrsvergliek sogor günstiger worrn.
Datenschuulbedenken to’n Verkoopstart vun Smart Glasses
Vun hüüt af an kann man ok in Düütschland de striedigen Smart Glasses kopen, mit de man filmen un fotograferen kann. Gegen de Brillen gifft dat vör allen Bedenken wegen de Datenschuul. De Organisatschoon HateAid hett al vörher Straafmellen gegen de Herstellers un Händlers vörleggt. Se sünd bang, dat mit de Brillen anner Lüüd filmt warra, ahn dat se dat markt. Denn de Opnahm warrt blots dörch en lütte LED wiest, de oplüchten deit.
Sleswig-Holsteen is praat för Katastrophenfall
Vundaag is internatschonalen Dag vun de Katastrophenvörsorg. Utropen hett em de Vereenten Natschonen. Dat Binnenministerium in Kiel meent, Sleswig-Holsteen is goot opstellt. Deken, Levensmiddel, Water, man ok Swemmwesten un Amphibienfohrtüüch höölt dat Land för den Krisenfall in dat Katastrophenschuullager in Boostedt (Kreis Sebarg) parat. Dat is in de verleden Johren utbuut worrn. Op lange Sicht will dat Land noch en Lager dorto inrichten. Ok vele Kreisen un dat DRK hebbt egen Katastrophenschuullagers.
Dat Wedder för Middeweek, den 14. Oktober
Middeweek Wessel ut Wulken un deels länger Sünnschien, mehrsttiets dröögg. Mitünner gifft dat toeerst noch hier un dor en Schuer. De Temperaturen klattert op 16 Grad in Flensborg un 18 Grad in Wedel. De Wind blaast mit Maten un in Böen, an de See frisch un in Böen starker, toeerst noch stöörmschen Süüd- bit Noordwestwind, över Dag warrt dat weniger.
De wiedern Wedderutsichten
Donnersdag neven Wulken ok Sünnschien, na Noordwesten hen mehr Wulken, meist dröög, in Noordfreesland kann dat ok Regen geven. Hööchstweerten 16 bit 18 Grad. De Wind weiht swach oder mit Maten, an de Noordsee to‘n Deel frisch vun de süden bi süüdwesten Kant.
De Rechten vun düsse Sennen liggt bi Kiel FM / de OK mediaHub Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de OK mediaHub Sleswig-Holsteen (OKSH) un de Norddüütsche Rundfunk (NDR).