luut & düütlich: Sennen vun Dingsdag
De Sennen "luut & düütlich" vun den 3. Mart 2026 to'n Nahören
De Narichten vun den 3. Mart
Eerste Fleger mit strannte Touristen in Dubai start'
För dusend düütsche Urlaubers, de wegen de Angrepen op den Iran in’n Negen Oosten fastsitten, kunn dat nu doch bald en Torüchkumst na Huus geven. Bunnsbutenminister Wadephul see in’t ZDF, he weer optimistsch, dat düt na un na glücken kunn. Man stah in engen Kuntakt mit de Reisveranstalters. Fröh vundaag start in Dubai en eersten Fleger vun de Airline Emirates in Richten Frankfoort an’n Main. De Verenigten Araabschen Emirate beedt Sünnerflöög för strannte Passageren an, dorbi warrt toeerst de Minschen bedacht, de al en Boken hebbt.
Sprit- un Böötöölpriesen stiggt wegen Krieg in‘n Negen Oosten
De Eskalatschoon in’n Negen Oosten hett eerste Folgen för de Spritpriesen in Düütschland. As de ADAC mitdeel, kost en Liter Super-E10 aktuell een Euro 84, un dormit rund söss Cent mehr as noch an’n Freedag. De Liter Diesel harr sik sogor in’n bunnswieden Snitt üm söven Cent verdüürt un kost opstunns een Euro 82. De ADAC rekent dormit, dat de Pries in de kamen Daag wieder stiggt. Ok wokeen Böötööl tankt, mutt deper in de Tasch griepen. 100 Liter kost aktuell in’n Snitt 123 Euro; an’n Freedag vör de Angrepen op den Iran leeg de Pries noch ünner de 100-Euro-Mark.
Antisemitismus-Beopdraagte föddert Waakheit ok in Düütschland
De Antisemitismus-Beopdraagte vun de Bunnsregeren, Klein, hett wegen de Angrepen op den Iran to Waakheit ok in Düütschland opropen. De aktuelle Eskalatschoon vun den Negen Oosten-Konflikt maakt ok de Bedrohenslaag för juudsche Leven hier to Lann höger, see Klein op NDR Info. De gröttsten Gefohren güngen opstunns vun de Hisbollah un vun Sympathisanten vun de iraanschen Revolutschoonsgarr ut. Togliek löövt he de düütschen Sekerheitsbehörden vun’n Verfatensschuul bet to de Lannskriminalämter, mit de ehr Anstalten för de Sekerheit he bannig tofreden weer.
Mehr Minschen in SH op Höörapparaten anwiest
In Sleswig-Holsteen hebbt in’t verleden Johr rund 11.000 Versekerte vun de AOK NoordWest en Höörapparaat kregen. Dat sünd üm un bi 14 Perzent mehr as in’t Vörjohr. Üm un bi de sülvigen Tallen gifft dat bi de TK in SH: Vun 2023 op 2024 geev dat en Anstieg vun 12 Perzent. De Barmer in’t Land registreert en glieken Trend. As Hööftoorsaken gellt dat tonehmen Öller vun de Minschen un unophöörliche Larmlast. Na en Studie vun den Bunnsverband vun de Höörsystem-Industrie vergaht vun’t eerste Wohrnehmen vun de Höörproblemen bet to’n Dokterbesöök in’n Snitt dree Johren. Meist en Drüttel vun de Minschen mit Höörproblemen laat sik liekers en Raatslag vun een Dokter nich mit Höörsystemen versorgen.
DFB-Fruens start in WM-Qualifikatschoon
De düütschen Football-Fruens fangt hüüt in Dresden mit de Qualifikatschoon för de Weltmeesterschop 2027 an. Gegen Slowenien tellt för Bunnstrainer Christian Wück blots en Sieg. Verzichten mutt de Mannschop dorbi op Klara Bühl. De Störmerin fallt wegen en Muskelverletzen ut. Blots de Gruppensieger qualifizeert sik direkt för de WM in Brasilien. Al an'n Sünnavend töövt mit Norwegen de neegste swore Gegner.
Dat Wedder för Middeweek, den 4. Mart
Middeweek fröh mutt sik de Nevel oder Hoochnevel eerstmal oplösen, man denn warrt dat en fründlichen Dag. Wi kriegt veel Sünnenschien un blots en poor lockere Wulken to sehn, un dat blifft överall dröög. De Hööchstweerten liggt an de See bi 6 bet 9 Graad. In’t Binnenland warrt dat en beten warmer: vun 9 Graad in Niebüll bet to 12 Graad in Wedel. De Wind weiht meist swack ut nördliche bet ööstliche Richten.
De wiederen Wedderutsichten
An’n Donnersdag geiht dat so wieder: Wenn de Nevel an’n Morgen weg is, schient faken de Sünn. Dortwüschen wiest sik hier un dor en poor lockere Wulken, aver dat blifft allgemeen dröög. De Hööchstweerten liggt an de See wedder bi 6 bet 9 Graad, sünst warrt dat 10 bet 14 Graad warm. De Wind weiht swack, an de Küsten ok matig ut Süüdoost.
De Rechten vun düsse Sennen liggt bi Kiel FM / de Apen Kanal Sleswig-Holsteen. Dat Projekt „PLATTform“ warrt vun de Medienanstalt Hamborg/Sleswig-Holsteen (MA HSH) mit Geller vun dat Land Sleswig-Holsteen föddert. Kooperatschoonspartner sünd de Apen Kanal Sleswig-Holsteen (OKSH) un de Norddüütsche Rundfunk (NDR).